Erakusketa handia egingo dute Gernikako bonbardaketaren urteurrenerako

Hezkuntza, Kultura eta Kirol ministro Jose Ignacio Wertek gaur aurreratu duen legez, Espainiako Gobernuak “behar bezala” ospatuko du Gernikako bonbardaketaren 75. urteurrena. Ospakizunaren ardatz nagusia izango da izen bereko Pablo Picassoren margolanean oinarritutako erakusketa handia.

Ministroaren aburuz, Condor Legioko hegazkinen bonbardaketak Gerra Zibilaren pasarteen artean “bereziki zorigaiztokoa” izan zen, “jatorri bereko jazoera ugari” bizi zituen gerraren baitan.

Gertaera honen oroitzapena, Wertek gehitu duen bezala, “gerraren kontrako kulturaren ikur eta ikono” den Picassoren ‘Guernica’ koadroa izango da ospakizun honen ardatz nagusia. Gaur egun, margolana ikusgai dago Madrilgo Reina Sofia Museoan.

Ez da argudio "nahikorik"

‘Guernica’ Gernika-Lumora eramateko eskaeren aurrean, Wertek “oso zailtzat” jo du Picassoren margolana lekuz aldatu ahal izatea. Izan ere, ministroaren ustez, koadroaren kokaguneak ahalbidetzen du herri honetatik zein “beste edozein lekutik” bisitatu ahal izatea.

Halaber, Wertek komentatu du koadroaren izena ez dela “behar den moduko argudioa” margolana lekuz aldatzeko eta txantxetan gogorarazi du Bredak ez duela ‘La rendición de Breda’ margolana herri horretara eramateko eskaerarik egin.