PSE: 'Lurraldeko interesak baino lehen, alderdikoak jartzen ditu EAJk'

EAJk "hauteskundeetako interesak gipuzkoarrenen gainetik" jartzen dituela salatu du Iñaki Arriola Gipuzkoako PSE-EEko idazkari nagusiak eta jeltzaleen "alderdiko estrategiaren ondorioz", erkidegoa "denbora eta aukera asko galtzen" ari dela uste du.

Horregatik, jeltzaleek Bilduko Aldundiaren kudeaketari egiten dizkieten kritikak "hitz hutsak" direla esan du.

Donostia eman duen prentsaurrekoan, Arriolak egoera politikoa baloratu du eta Gipuzkoan akordioak lortzeko PSEk "ateak irekita" dituela gogoratu du. Bere ustez ,akordio horiek "gogo politikoaren" baitan daude. "Hauteskundeen hurrengo egunean jada esan genuen, eta berdin pentsatzen dugu gaur. Beste batzuen baitan dago, batik bat, EAJren baitan. Hala ere, orain arte ez dugu inongo interesik ikusi", adierazi du.

Bilduk "argi utzi du Gipuzkoa aurrera ateratzeko ezintasun eza",  Arriolaren iritziz eta krisi garaian, gipuzkoarrek "Gobernu sendoa behar dute".

Adegik iragarri dituen 2012ko datuen "panorama beltza" aipatu du, eta horren aurrean, ahaldun nagusiak " lurraldeko krisian baino, kezka gehiago Tolosan" izatea egotzi dio.

Honen harira, 2012ko aurrekontuetan, inbertsioak % 52,13 jaitsi direla esan du eta horrek "Gipuzkoako enpleguan ondorio zuzenak" izango dituela uste du.

Gainera, Garitano "sortzen laguntzen ari den egoeraren aurkako pankartaren atzean jartzea" kontraesana dela esan du. "Murrizketen aurka manifestatzea ez da logikoa, inbertsioaren, berrikuntzaren eta lehiakortasunaren murrizketen ahalduna denean", gaineratu du.