Ullibarri: 'Ergel batek soilik bidaliko luke bere ordenagailutik'

Joseba Andoni Ullibarri Urraca akusatuak Auzitegi Nazionalean esan duenez, "ergela izan behar zara" mota horretako mezu bat zure ordenagailu pertsonaletik bidaltzeko. Ullibarri Auzitegi Nazionalean epaitzen ari dira, Teresa Jimenez Becerril Alderdi Popularreko eurodiputatuari Internet bidez mehatxuak egitea leporatuta.

Fiskaltzak terrorismoaren biktimak umiliatzea egotzi dio, eta urte eta erdiko kartzela zigorra eskatu du Ullibarrirentzat.

"Nik ez dut inoiz horrelakorik idatzi foro batean", adierazi du Ullibarrik. Ildo horretan, mezu horiek "arrastoa” uzten dutela eta, beraz, horiek bidaltzea zentzugabea dela azpimarratu du. "Zure NAN agiria uztea bezalakoa da. Etxetik egitea zeure burua salatzea da", gaineratu du.

Halaber, eztabaida filosofiko batengatik "inoiz" ez lukeela minik egingo esan du. Ildo horretan, eztabaidagai den testua "matxista eta baldarra" iruditzen zaiola gaineratu du.

Miguel Angel Carballo fiskalak Ullibarriri terrorismoaren biktimak umiliatzeko delitua egotzi dio, eta bost urtez biktimari eta haren familiari urreratzea debekatzea eskatu du.

Txostenaren arabera, akusatua ordenagailu eramangarriaren bitartez konektatu zen 2010eko ekainaren 29ko 22:55ean. Gau hartan eurodiputatuaren web orrialdean sartu zen, buruzagi ‘popularra’umiliatzeko asmoz, hura Alberto Jimenez Becerrilen arreba izateagatik.

Akusatuak web orrialdean honako hau idatzi zuen: "Ea zorte pixkatekin tiro bat ematen dizuten, behin betiko tregoa baino lehen, eta lehenbailehen zeure senideekin biltzen zaren, emagaldua…Muxutxo bat".

PPko eurodiputatuak bihar deklaratuko du epaitegian; epaiketa 10:00etan hasiko da berriro.