Lehendakaria 'eragile aktibo' bihurtzea nahi du ezker abertzaleak

Datorren martxoaren 8an Patxi Lopezek Eusko Legebiltzarrean aurkeztuko dituen bakerako ekimenen harira, lehendakaria "konponbidearen bilaketan eragile aktibo bihurtzea" espero du Maribi Ugarteburu ezker abertzaleko bozeramaileak. "Lehendakariak konponbiderako trena hartzea espero dugu", azpimarratu du.

Europa Pressi eskainitako elkarrizketan Ugarteburuk azaldu duenez, baliteke presoek aurrepausuak ematea baldin eta haien "estatus politikoa" aitortzen bada eta berriz elkartzen badituzte. Gainera, "meza-laguntzaile" gisa EAJ aritzearen beldur da, "aukera independetista batek botere kuotarik lortu ez ditzan".

Halaber, Rajoyren Gobernuak ETAko presoen egoerari eta Sorturen legeztapenaren auziari heltzea "premiazkoa" dela uste du Ugarteburuk. "Gobernuak ez du aitzakirik dagoeneko, ezta hainbatetan aipatu duten legezkotasun hura ere, gaur eguneko legezkotasunari so eginda ere, Sortu legeztatu eta presoen sabakabanatzearekin eta gaixo dauden lagunen espetxealdiekin amaitu behar duelako", esan du bozeramaileak.

"Ekar itzazue hona. Presoek aurrerapausoak ematea nahi duzuela? Kartzela politika aintzat hartuta, berriz elkartzen baldin badituzue eta estatus politikoa aitortzen bazaie, litekeena da haiek pausoak ematea", iragarri du Ugarteburuk.

Kritikak EAJri

Halaber, ezker abertzaleko bozeramaileak EAJ kritikatu du. Haren esanetan, "hautestontziak, botoak lortzea eta erakundeetan botere gehiago eskuratzea" dira alderdi jeltzalearen kezka bakarrak. "Kezkagarria da EAJk Kongresuko Akordioa sinatu izana, eduki baztertzailea duelako", gaineratu du.

"EAJ ez dago egoerak eskatzen duen neurrira, guztiok umiltasun ariketa bat egin behar dugulako eta, legitimoak izan daitezkeen interesak alde batera utzita, amankomuneko interes baten alde jokatu behar dugu", ondorioztatu du.