Politika -
EAJ
Agirrek ez dauka Araba Buru Batzarrean nahiko lukeen lantaldea
EAJren Arabako buru berriak, hala ere, aurrerantzean 14 burukideak eta bera "talde" bat izatera iritsiko direla eta "norabide berean" arraun egingo dutela espero du.
Erredakzioa
Xabier Agirre EAJren Arabako presidente berriak azaldu duenez, Araba Buru Batzarraren zuzendaritza ez da "nire lantaldea", eta ez da EAJ Araban zuzentzeko nahiko lukeen pertsona taldea. Hala eta guztiz ere, bi hautagaien arteko borroka dagoeneko amaitu dela espero du Agirrek.
ETBn egindako elkarrizketa batean adierazi duenez, Arabako EAJren presidente izendatzeko egindako bileraren ondoren, Iñaki Gerenabarrena beste hautagaiak, eta orain arte ABBren (Araba Buru Batzar) presidente zenak, zoriondu egin zuen.
Agirreren esanetan, larunbatekoa "bilera luzea eta tentsio handikoa" izan zen, gainerako burukideak aukeratzeko garaian batez ere.
Eztabaida luzatu egin zen, izan ere, "ez ziren gehiengoak lortzen" eta azkenean, hautatutako 14 burukideetako 9 Gerenabarrenaren hautagaitzakoak izango dira, beraz: "Ez da ABBra iristean nahi nuen lantaldea".
Hala eta guztiz ere, aurrerantzean 14 burukideak eta bera "talde" bat izatera iritsiko direla eta "norabide berean" arraun egingo dutela espero du.
Helegitea
Botazioaren inguruan zalantzak agertu zituzten hainbat kidek eta helegitea aurkezteko aukera ez dute baztertzen. Horren harira, Agirrek azpimarratu du berak kanpotik jarraituko duela gatazka hori.
