Santiagoko alkateak dimititu du, epailearen inputazioa jaso ondoren

Gerardo Conde Roa (PP) Santiagoko alkateak bere dimisioa aurkeztu du gaur, Jose Antonio Vazquez Tain epailearen eskutik Ogasun Publikoaren aurka leporatzen dizkioten delituak ezagutu ondoren.

Santiagoko alkateak agerraldia egin du bere erabakiari buruz informazioa emateko. Geslander sozietatearen 61 etxebizitza saldu zituen alkateak 2010. urtean, eta ez zuen 291.000 euroko BEZa ordaindu. Epaileak operazio horretan deliturik izan zen aztertuko du orain.

Alkateak 2011ko uztailean kargua hartu zuen. "Hiri honek asko balio du, eta ez du nire egoeran dagoen alkate bat merezi", adierazi du.

Bere familiarentzat erabakirik "onena" hartu duela azpimarratu du, baita bere alderdiarentzat ere.