Itxi

Politika

EPAIA

Gorenak atzera bota du Atristain ETAko presoaren eskaera, Europako Auzitegiak eskubideen urraketa ikusi arren

EITB MEDIA

Zigor-arloko aretoak uste du ez dela bidezkoa kasu honetan epai irmoa berrikustea, Giza Eskubideen Europako Auzitegiak urraketa ikusi badu ere. "Hau ez da ez justizia, eskandalua baizik", salatu du Sortuk Twitter sare sozialean.

  • Xabier Atristain presoa eta Arkaitz Rodriguez Sortuko idazkari nagusia. Artxiboko argazkia: EFE

    Xabier Atristain presoa eta Arkaitz Rodriguez Sortuko idazkari nagusia. Artxiboko argazkia: EFE

Auzitegi Gorenak atzera bota du Xabier Atristain ETAko presoak Giza Eskubideen Europako Auzitegiak emandako epaiaren ostean bere zigorra berrikusteko egindako eskaera. Izan ere, epai horren arabera, berme guztiak dituen prozesu baterako eskubidea urratu zitzaion, poliziaren galdeketa batean bere aukerako abokatu bat izendatzea eragotzi zion erabaki judiziala arrazoitu ez zelako.

Zigor-arloko aretoak ebatzi du, Giza Eskubideen Europako Auzitegiak hautemandako urraketak eragindako adierazpenak alde batera utzita ere, badirela horiekin zerikusirik ez duten beste froga batzuk kondena oinarritzen duten egitateei buruzko ondorio bera lortzeko; beraz, dio ez dela bidezkoa kasu honetan epai irmoa berrikustea.

"Hau ez da ez justizia, eskandalua baizik", salatu du Sortuk Twitter sare sozialean.

Asteazken honetan bertan sinatutako ebazpenean, gai penaletarako aretoak Atristainen helegitea atzera bota eta 17 urteko espetxe-zigorra berretsi du, erakunde terroristako kide eta armak eta lehergaiak izatea leporatuta.

Sortu: "Hau ez da ez justizia, eskandalua baizik"

"Aurrekaririk gabeko eskandalua da, Espainiako Estatuak euskal independentismoaren aurka erabilitako eskubideen urraketei erabateko inpunitatea eskaintzen dielako", azaldu du Sortuk agiri batean.

Horregatik, "gainerako eragile politiko, sindikal eta sozialei bidegabekeria honen aurka ahotsa altxatzea", eskatu die, "askatasun, bake eta elkarbizitza demokratikoaren eraikuntza oztopatzen duelako".

"Xabier Atristaini 17 urteko espetxe-zigorra ezartzea posible izan zen, haren oinarrizko eskubideak urratu ondoren", nabarmendu du alderdi abertzaleak.

"Defentsa eta bidezko prozesu zuzen bat izateko eskubideak urratu zizkioten. Ez bakarrik berari, milaka euskal herritarri baizik", errepikatu du Sortuk. "Presoen aferari arrazoizko konponbide bat eman beharrean, Estatu 'sakonak' ihes egitea eta Atristainen eskubideak urratzea erabaki du, bidezko irtenbide logikoa eman ahal izateko, Estrasburgok zabaldutako atea itxi nahian", deitoratu du.

"Espainiako epaileen jarrera honekin Zuzenbidezko Estaturik ez dela demostraturik geratu da beste behin ere", gaineratu du alderdi independentistak.

Gorenak, Fiskaltza Atristainen helegitea onartzearen aurka azaldu ostean, hartu du erabakia. Magistratuen arabera, Poliziaren egoitzan egindako deklarazioa kontuan hartu gabe ere, gainerako frogek lehergaien eta armen existentzia agerian uzten dute.

Gainera, gogorarazi dutenez, Atristaini 12.000 euroko kalte-ordaina ematera behartu zuen Giza Eskubideen Europako Auzitegiak dagoeneko, baita prozesu-kostuak eta eskubideen urraketa kalteen gastuak ordaintzeko beste 8.000 euro ere. Gorenak azpimarratu du Estrasburgok ez duela argudio gehiago ematen, "erreparatzeko ahalegin handiagoa egiteko".

Presoak "automatismoarekin" zigorra berrikustea eskatu du, "argudio, itxuraz, apalekin", baina ezin diote halakorik eman, Gorenak ebazpenean ziurtatu duenez.

"Berrikusketa ez da urraketa aitortzaren beharrezko ondorioa", azaldu dute magistratuek. Giza Eskubideen Europako Hitzarmenaren urraketarekin zigorra berrikustea posible den kasu bakoitzean egiaztatu behar dela uste du Gorenak.

Kasu honetan, armen eta lehergaien aurkikuntza Atristainen aitorpenean soilik oinarritzen ez dela errepikatu du Gorenak, 17 urteko zigorra babesteko froga gehiago daudela iritzita.

Bestalde, Aretoaren hitzetan, Estrasburgon egoitza duen auzitegiak tratu txarren existentzia ukatu zuen, eta "salatzailearen deklarazioa libre eta boluntarioa" izan zela ziurtatu zuen, "inolako bortxarik eta presiorik gabe".

  • Bisitatuena

      Kargatzen ikusiena
      Kargatzen ikusiena