Antiguedadentzat ez dago arrazoi politikorik bateraezintasun erabakian

Iñaki Antiguedaden ustez ez dago arrazoi politikorik Kongresuak bere bi karguen bateraezintasuna dela-eta hartutako erabakian. ''Erabaki erabat teknikoa izan da'', esan du.

Orain hilabete Diputatuaren Estatuaren Batzordeak karguetan bateraezintasuna zegoela ebatzi zuen, eta ebazpen horren aurrean, unibertsitateari lehentasuna ematea erabaki zuen Antiguedadek.

Asteazken honetan egin du azken eguna diputatu gisa, eta Madrilen egindako lanaren balorazioa egin du Radio Euskadiko ''Ganbara'' saioan.

Antiguedadek esan du Madrilen arazorik izan ez dutela. ''Ez da egon aurpegi txarrik. Kafea hartzera ez gaituzte gonbidatu, baina naturaltasunez joan da jarduna'', azaldu du.

Amaiurrek Kongresuan lan pedagogiko oso garrantzitsua egiten ari dela uste du.

''Madrilen presoen inguruan hitz egitea tentuz hartzeko modua da, bakoitzak egiaren bere zatia duelako. Garrantzitsuena ez da aurrean dituzunak konbentzitzea, hori ezinezkoa delako. Garrantzitsuena da jendeak Amaiur bertan egongo ez balitz entzungo ez lituzkeen gauzak entzutea'', esan du Antiguedadek.

Haren hitzetan, ''PPk bere burua ispiluan begiraraztea'' da koalizioak Madrilen egin beharrekoa lana. ''Pedagogikoki PPri presioa egitea'', gaineratu du. ETAren inguruan Gobernuak duen jarrerari buruz ere egin du hausnarketa elkarrizketan zehar, eta ''disoluzio'' hitza lengoaiaren ''komodin'' bihurtu dutela esan du.

''Zer da disoluzioa Gobernuarentzat?'' galdera luzatu ondoren, gai horretan Gobernuak ikuskatze prozesuan zuzenean parte hartu behar duela defendatu du.

Barne ministroarekin espetxe politika dela-eta izandako eztabaiden inguruan, Antiguedadek esan du PPk ''eskubideak urratzen uzteari beldur diola''. ''Hori egiten badute, bigarren maila batera jo beharko dute, eta ez dute bakerako programarik prest'', esan du.

Etorkizunean Eusko Legebiltzarrean egongo ote den galdetuta, Antiguedadek esan du ''politika egiteko modu asko'' daudela.