Politika -
NATO-ren goi-bilera Madrilen
Biriatuko kontrol bereziak igande gauerdira arte luzatuko dira
Denis Itxaso Espainiako Gobernuak Euskadin duen ordezkariak azaldu duenez, "naturala den bezala", ezaugarri hauetako ekitaldi baten aurrean, "Estatuak segurtasun neurriak areagotu behar ditu, baita mugen kontrola ere".
Agentziak | EiTB Media
Denis Itxaso Espainiako Gobernuak Euskadin duen ordezkariak iragarri duenez, Biriatuko muga pasabidean segurtasuna indartu dute, NATOk Madrilen goi-bilera egin behar duelako. Kontrol bereziak egongo dira datorren igandeko 00:00ak arte.
Barne Ministerioak dispositibo garrantzitsua diseinatu du, Madrilera iritsi behar diren estatuburuen eta gobernuburuen segurtasuna bermatzeko. NATOren goi-bilera ekainaren 28tik 30era bitartean egin behar dute, Espainiako hiriburuan.
Itxaso atzerriko kontsulatuen ordezkariekin bildu da Bilbon harremanak estutzeko. Prentsaurrekoan azaldu duenez, "naturala den bezala", Aliantza Atlantikoaren batzarraren aurrean, "Estatuak segurtasun neurriak areagotu behar ditu, baita mugen kontrola ere".
Horregatik, azpimarratu duenez, mugan, Biriatuko pasabidean, "kontrolak dezente areagotu dituzte dagoeneko, eta, printzipioz, ekainaren 3ko 00:00etara arte izango dira indarrean".
