Politika -
Kopako finala
Aguirreren proposamena 'lekuz kanpo dago' Urquijorentzat
"Polemikarekin amaitzeko" eta finala politizatu eta erabili nahi dutenei "behar dena baino oihartzun gehiago" ez emateko eskatu du.
Erredakzioa
Esperanza Aguirrek proposatu duena "lekuz kanpo" dagoela adierazi du Carlos Urquijo Espainiako Gobernuak EAEn duen ordezkariak, eta Errege Kopako finalaren inguruko polemikarekin amaitzeko eskatu du, finala politizatu nahi dutenei "behar dena baino oihartzun gehiago" ez emateko.
"Ikuskizun hau politizatzeko ahalegin oro lekuz kanpo dago", azpimarratu du Gobernuak EAEn duen ordezkariak. "Nabaria da webguneetan zein erakundek bultzatu duten Printzearen eta Espainiako ikurren aurka txistuak egitea", Urquijoren ustez, baina "pertsona zentzudunek ez liekete aldarrikapen politiko bat eta kirol ikuskizun bat bereizten ez dakitenei oihartzun gehiago eman beharko".
Halaber, zaleak Madrilera joatera bultzatu ditu, Athletic anima dezaten, berak egingo duen bezala, eta "kirol festa hori inork ez zikintzea" espero duela gaineratu du.