Amnistia Internazionalak 'oso gertutik' jarraituko du Euskadiko egoera

Aministia Internazionalak (AI) iragarri du "oso gertutik" jarraituko duela Euskadiko egoera, ETAk indarkeriaren amaiera iragarri duen honetan, eta lurraldeak "Giza Eskubideen agenda bat" behar duela iritzi dio, delitu guztiekin justizia egingo dela bermatzeko.

Giza Eskubideei buruzko 2012ko txostenaren aurkezpen prentsaurrekoan, Esteban Beltran AIk Espainian duen zuzendariak iragarri du "aurki" bisita egingo dutela Euskadira, eta gaineratu du ez dutela "amore emango" Giza Eskubideak "kasu guztietan" bete arte.

Beltranen ustez, Euskadik hiru puntuko agenda bat behar du: "Biktimek kalte-ordainak eta justizia jaso behar dituzte; torturek eta tratu txarrek ere kalte-ordainak eta justizia izan behar dituzte; eta salbuespeneko legeak bertan behera utzi behar dira". Salbuespen lege horren adibide, inkomunikazioa aipatu du.

Hain justu, presoen inkomunikazioa erakundeak egiten duen munduko Giza Eskubideen txostenean etengabe agertzen den gaietako bat da.

Agintariek delitu terrorista baten susmagarria 13 egunez familiarekin eta abokatuekin inolako kontaktu edo informaziorik izan gabe atxilotzeko aukerak, eta berak hautatutako mediku baten azterketa jasotzeko aukerarik gabe, " ikuskapenik gabeko zulo beltza da, tortura errazten duena", erantsi du Beltranek.

Erakundeak, halaber, torturen eta poliziak emandako tratu txarren inguruko salaketak aztertzeko geldotasuna kritikatu ditu.