Ezker Anitza-IUko zinegotziak dimititu du, koalizioaren bozeramailearen "irain eta indarkeria fisikoagatik"

Haizea Garay Donostiako Udaleko Ezker Anitza-IUko zinegotziak dimisioa eman du Aitzole Araneta Elkarrekin Donostiako koalizioko bozeramailearen "jarreragatik". Elkarrekin Donostia koalizioko kide da Ezker Anitza-IU.  

Arantza Gonzalez Gipuzkoako Ezker Anitza-IUko koordinatzaileak dimisioaren berri eman du ostiral honetan, ohar baten bidez. Horren arabera, Haizea Garayk "jazarpena, ahozko indarkeria eta baita indarkeria fisikoa" jasan ditu Aitzole Aranetaren partetik. Jazotakoa "irmo" gaitzetsi ditu Ezker Anitza-IUk, esanez ezin dela "denbora gehiagoz onartu".

Donostiako Udaleko bost talde politikoetako bat da Elkarrekin Donostia (Podemos/Ezker Anitza-IU/Equo-Berdeak), eta hiru zinegotzi ditu.

Ezker Anitza-IUren hitzetan, "Ezker Anitzak defendatzen dituen baloreak" ez datoz bat Aranetaren jarrerarekin, eta gertatutakoak "ordezkari publiko izateko edozein pertsona ezgaitzen du".