Politika -
katalunia
ANCk sedizio delituaren erreformaren aurkako manifestazioa deitu du Konstituzio egunerako
Erakunde independentistak uko egin dio Espainiako Gobernuak iragarritako erreformari, helburu bikoitza duela argudiatuta: "kaleetan mobilizazio independentista zigortzea eta U-1ekoak bezalako gertaerak erosoago zigortzea".
agentziak | eitb media
Kataluniako Asanblea Nazionalak (ANC) manifestazioa deitu du Bartzelonan datorren abenduaren 6rako, Konstituzio egunerako, Espainiako Gobernuak iragarritako Zigor Kodearen erreformaren aurka agertzeko. Izan ere, iragarri du sedizio delitua kenduko duela, eta "desordena publiko larri" izeneko beste batekin ordezkatuko duela.
Erakunde independentistak ohar baten bidez adierazi duenez, lege erreformak "disimulurik gabeko helburu bikoitza du: kaleetan mobilizazio independentista zigortzea eta U-1ekoak bezalako gertakariak erosoago zigortzea, instalazioak edo eraikinak okupatzeagatik".
Manifestazioa abenduaren 6an izango da, 12:00etatik aurrera, eta Generalitateko Jauregi parean amaituko da: "Ezin diogu proiektu honi aurrera egiten utzi, eta are gutxiago gure ordezkari politikoen botoekin".
PSOEk eta Unidas Podemosek sedizio delituaren gehienezko espetxe zigorra 15 urtetik bost urtera jaisteko erreforma aurkeztu zuten ostiral honetan Kongresuan. Hala, delitu hori desagertu egingo da eta "desordena publiko larri" izena hartuko du, zortzi urterainoko desgaikuntzarekin.
ANCk defendatu duenez, "nahiz eta egia izan sedizioaren erreforma honek gutxi batzuei espetxe zigorrak mugatuko dizkiela, Zigor Kodearen aplikazioa errazten du, manifestazio eskubidea gauzatzen duten milaka ekintzaileri kartzela zigorrak ezartzeko".
Erakunde independentistak adierazi duenez, aurkeztutako testuak esplizituki jasotzen du hiru urtera arteko espetxe zigorrarekin zigortuko direla "instalazioak edo eraikinak inbaditzea", "pertsonen bizitza edo osasuna arriskuan jartzen duten bide publikoak oztopatzea" eta "pertsona edo objektuenganako larderia".
Plataformak defendatu duenez, testu horrek "kartzelara eramango lituzke eraikin eta eskola publikoetan independentziari buruzko erreferenduma baimendu eta babestu zuten milaka pertsonak, baita manifestazio baketsuaren eskubidea erabilizi, mundua Espainiako Estatuaren errepresioaz ohartarazteko errepideak edo bide publikoak moztu zituzten milaka pertsonak ere".