Inkesten arabera, EAJk % 32ko babesa jasoko du hauteskundeetan; koalizio abertzaleak, berriz, % 24,7koa. PSE-EE eta PP egungo Jaurlaritza errepikatzeko aukerarik gabe geratuko dira.
EAJk irabaziko ditu EAEko hurrengo hauteskundeak 23 edo 24 legebiltzarkide lortuta, gehiengo absolutua ematen duten 38 eserlekuetatik urruti geratuko da, eta Euskal Herria Bildu oso gertu izango du, 22 legebiltzarkiderekin. PSE-EE hirugarren tokian geratuko da 17 legebiltzarkiderekin, eta PPk 12 edo 13 eskuratuko ditu. Ezker Anitzak eta UPyDk Legebiltzarrean dituzten ordezkariak galduko dituzte.
Hori dio behintzat uztailaren 6an argitaratutako Euskobarometroak, Euskal Herriko Unibertsitateak maiatzean egindako 1.200 elkarrizketaren bidez osatutako ikerketa soziologikoak.
EAJ izango da EAEn boto gehien jasoko duen alderdia, 350.000 hain zuzen ere, boto-emaileen % 32ren babesarekin (2009an 399.600 boto jaso zituen, % 38). Hala ere, Bizkaian soilik izango da alderdi bozkatuena. Lurralde horretan botoen % 37,3 eta 10 eserleku lortuko ditu, baina Araban eta Gipuzkoan ez du aurreko hauteskundeetako garaipena errepikatuko: bigarren geratuko da bi kasuetan, botoen % 24,7 eta 7 eserleku Araban eta botoen % 23 eta 6 edo 7 eserleku Gipuzkoan.
Ezker abertzalea Eusko Legebiltzarrera itzuliko da EH Bildu koalizioaren bitartez (ezin izan zuen aurreko hauteskundeetan parte hartu). Gainera, EAJri Legebiltzarrean duen nagusitasuna lehiatzeko moduan itzuliko da. EH Bildu lehenengo indarra izango da Gipuzkoan botoen % 36,6rekin eta 10 eserlekurekin, 6 eserleku eta bigarren postua lortuko du Bizkaian (% 22), eta 6 eserleku Araban (% 20).
PSE-EEk behera, PPk eutsi egiten dio
PSE-EEk atzera egingo du nabarmen eta 210.000 botorekin, % 20ko babesa eta 17 eserleku lortuko ditu, egungo Jaurlaritza errepikatzeko batere aukerarik gabe. Emaitza onenak Araban eta Bizkaian izango ditu, % 20ko babesa eta 6na eserleku lortuta. Gipuzkoan, berriz, 5 eserleku eta botoen % 18 eskuratuko ditu. Hirugarren postuan geratuko da hiru lurraldeetan.
Hala eta guztiz ere, gehiengo absolutua lortu duen alderdirik ez dagoenez, Jaurlaritza berria baldintzatzeko edo kide izateko aukerak izan ditzake.
Aukera berbera izan dezake PPk. Popularrek 150.000 boto inguru jasoko dituzte, % 14 hain zuzen ere. Hori horrela, 2009ko emaitzei eutsiko die, baina agian ez du lortuko 13 legebiltzarkideei eustea, Euskobarometroak 12-13 ematen baitizkio.
Emaitza onena Araban lortuko du, aurreko hauteskundeetan galdutako gehiengoa berreskuratuta. Han, herritarren % 26ren babesa jasota, sei edo zazpi eserleku lortuko ditu, Gipuzkoan 3 (% 11) eta Bizkaian beste hainbeste (% 14).
UPyD, Ezker Batua eta Ezker Anitza, ez
Hurrengo Legebiltzarreko beste aldaketetako bat alderdi 'txikien' desagerpena izango da. Izan ere, UPyD Legebiltzarretik kanpo geratuko da, 25.000 botorekin herritarren % 2ren babesa soilik izango duelako. Gauza bera gertatuko zaie Ezker Batuari eta Ezker Anitzari: bien artean 60.000 boto lortuko lituztekete (% 5), baina zatiketak ordezkaririk gabe utziko ditu.
Gehiengo abertzalea
Hurrengo hauteskundeetatik aterako den Legebiltzarrak gehiengo abertzale nabarmena izango du: EAJk eta Bilduk 45 edo 46 eserleku izango dituzte; PSE-EE eta PP, berriz, 30era iritsiko dira larri larri. Ezkertiarrei eta eskuindarrei dagokienez, ezkertiarrek irabaziko dute, baina alde txikiarekin (hiru legebiltzarkide).
Parte-hartzea
Euskobarometroaren arabera, hauteskundeetako parte-hartzea duela hiru urteko hauteskundeetan izandakoaren antzekoa izango da, % 65 ingurukoa. Inkesta erantzun dutenen % 74k badaki nori emango dion botoa, baina % 26k oraindik ez dakite bozkatzera joango ote diren, eta joatekotan nori emango ote dioten.