Eusko Legebiltzarrak legebiltzarkideen bateraezintasunak aztertuko dituen batzordea izendatu du

Eusko Legebiltzarrak izapide berri bat bete du legegintzaldiaren hasiera honetan, Bateraezintasunen Behin-behineko Batzordea izendatuta. Organo hori arduratuko da aztertzeaz legebiltzarkideren bat beste jarduera batzuk direla-eta kargurako bateraezintasunik ote duen.

Jon Aiartza eta Josune Escota (EAJ), Ohiana Etxebarrieta eta Nerea Kortajaerna (EH Bildu), Alberto Alonso eta Miren Gallastegui (PSE-EE), Ainhoa Domaica eta Muriel Larrea (PP), eta Jon Hernandez eta Amaia Martinez (Talde Mistoa) izango dira batzordeko kideak.

Bateraezintasunen Behin-behineko Batzordeak, gehienez ere 20 eguneko epean, legebiltzarkideen egoera aztertuko duen irizpena helarazi beharko dio Osoko Bilkurari. Irizpen horretan, legebiltzarkideetako batek kargurako bateraezintasunik duen zehaztuko da, beste jarduera batzuk direla-eta.

Bateraezintasunei buruzko irizpena onartzeko osoko bilkura maiatzaren 23an egingo da, eta Bakartxo Tejeria Legebiltzarreko presidenteak hurrengo lehendakaria izendatzeko osoko bilkuraren data jakinaraziko du.