Nafarroak helegitea jarriko du, dependentziako murrizketen aurka

Nafarroako Parlamentuko osoko bilkurak konstituziokontrakotasun-helegitea aurkeztea onartu du dependentzia alorrean egingo diren murrizketen aurka. Aurrekontuen egonkortasuna lortzeko eta lehiakortasuna bultzatzeko dependentzia alorrean murrizketak egingo zituela jakinarazi zuen Gobernuak uztailean kaleratu zuen Errege Lege Dekretuan.

Zehatz-mehatz esanda, errekurtsoak ondorengo arlo hauei eragiten die: dependentzia mailei dagokien araudi berriari, etxeko arreta zerbitzuari, diru-laguntzen bateraezintasunari, diru-laguntzen gehienezko kopuruari, eta eskaini ahal diren zerbitzuen aukerari.

Alderdi politikoen erreakzioak

UPN alderdiarentzat “garrantzitsua da Nafarroako Parlamentuak helegitea aurkezteko aukera izatea”, Carlos Garcia Adanero parlamentariaren iritziz.

Iritzi berekoa da Nafarroako Alderdi Sozialistako Juan Jose Lizarbe parlamentaria, Nafarroako Foru Erkidegoko “autogobernua” babesteko Auzitegi Konstituzionalaren aurrean helegitea aurkeztea garrantzitsua da, horren ustez.

NaBai koalizioak UPN alderdiaren jarrera “txalotu” du, eta dekretuak, “krisiari aurre egiteko baino", eredu neoliberala bermatzeko neurri zorrotzak proposatzen dituela esan du.

“Helegiteak aurkeztea ez da bide bakarra herritarren eskubideak defenditzeko, eta, gainera, ez dute Estatuaren erabakiak aldatzeko balio”, Bilduko Maiorga Ramirezen ustez.

Dependentzia Legea gizarte-alorrean egindako aurrerapen handietako bat izan zen, Txema Mauleon parlamentariaren iritziz. Halaber, “PPren politika murriztaileak desagertzera eramango du”, gaineratu du.