AI: 'Poliziak manifestazioetan duen jarrera neurrigabekoa da'

‘Amnistia Internacional’ek (AI) Espainian azken bi urteetan izandako manifestazioetan Poliziak izan duen neurrigabeko jarrera salatu eta agenteen gehiegikeria ikertu dezan eskatu dio Gobernuko Barne Ministerioari.

Erakundeak “Poliziaren jokaera Europar Batasuneko manifestazioetan” izeneko txostena aurkeztu du gaur, eta bertan, Espainian, Grezian eta Errumanian izandako manifestazioetan parte hartu duten pertsonen testigantzak bildu dituzte. Testigantza horien ondorioz, manifestazio horietan “atxiloketa arbitrarioak eta osasun laguntzarako oztopoak” izan direla salatu dute.

“Zigorgabetasun poliziala”

Virginia Alvarez ‘Amnistia Internacional’eko Giza Eskubideen arduradunak agenteen aurkako salaketetan erabiltzen diren mekanismoak zalantzan jarri ditu. “Ez dago berme judizialik, agenteen gehiegikeriak ikertu gabe geratzen dira”, azaldu du.

AIko ordezkariak joan den irailaren 25ean Diputatuen Kongresuan eta Atotxako tren geltoki barruan gertatutako istiluak jarri ditu adibide modura. Alvarezen aburuz, agenteek “bereizi gabeko erasoa eraman zuten aurrera” bertan zeuden bidaiari eta kazetarien aurka.

“Faltsua eta partziala”

Polizia sindikatuek txostena “faltsua eta partziala” dela salatu dute gaur.

Poliziaren Sindikatu Bateratuak (SUP), Espainiako Poliziaren Konfederazioak (CEP) eta Poliziaren Sindikatu Profesionalak (SPP) salaketa kritikatu eta irizpide objetiborik ez duela azaldu dute.

Jose Maria Benito SUPeko ordezkariak txostena faltsua dela gogorarazi du, “Espainian, urtero, 40.000 manifestazio izaten baitira, eta oso gutxitan izaten dira istiluak, beraz datu horiek ez dira esanguratsuak”.