Google Glass, egun batez salgai

Google konpainiak Google Glass betaurreko adimendunak salgai jarriko ditu gaur, baina bakarrik egun batez, eta AEBn baino ez, 1.500 dolarreko (1.080 euro) salneurrian.

Enpresak azaldu duenez, salgai izango diren betaurrekoen kopurua mugatua izango da. Oraingoan, baina, edozein kontsumitzailek erosi ahalko ditu, orain arte aplikazio garatzaileentzat baino ez baitzeuden eskuragarri.

Betaurreko adimendunek pantaila txikia dute, eta askotariko informazioa islatzen da bertan. Gainera, aginduak ahots bidez ematea ahalbidetzen dute, musika jartzeko, mezuei erantzuteko, oharrak diktatzeko eta Interneten bilaketak egiteko, besteak beste.

Halaber, bideoak grabatu eta argazkiak egiteko aukera ematen du, baina oraindik aplikazio gutxi daude eskuragarri.

Google Glass betaurrekoak aurtengo bigarren seihilekoan jarriko dituzte behin betiko salgai, eta litekeena da azken prezioa merkeagoa izatea, 600 dolar (433 euro) ingurukoa.

Ia hiru urte igaro dira Googlek errealitatea areagotzen duten betaurrekoak aurkeztu zituenetik. Tarte horretan, betaurrekoen diseinua, funtzioak eta aplikazioak hobetzeko lanean aritu dira.

Konpainiak erabilera onen gida argitaratu du, Google Glass erabiltzean gerta litezkeen arazoak ekidin nahian.