Teknologia -
Sare sozialak
Obamak orrialde pertsonala zabaldu du Facebooken
Etxe Zurian geratzen zaizkion 14 hilabeteetan herritarrekin zuzeneko harremana izan nahi du AEBko presidenteak.
Agentziak | Erredakzioa
Barack Obama AEBko presidenteak orrialde pertsonala zabaldu berri du Facebooken: "President Obama". AEBko buruzagiak sare sozial honetan ireki duen bigarrena da, aurretik "Barack Obama" izeneko fanpage profesionala zuelako (45 milioi jarraitzaile). Bigarren honekin, ordea, Etxe Zurian geratzen zaizkion 14 hilabeteetan herritarrekin harreman zuzenagoa izan nahi du.
Ordu gutxitan, 565.000 jarraitzaileren langa gainditu du orrialdeak. "Kaixo Facebook! Azkenean badut nire orrialde propioa", idatzi du bere aurreneko mezuan. Lerro batzuk idaztearekin batera, bideo bat ere igo du AEBko agintariak. Bertan, Etxe Zuriko atzeko lorategian ageri da, osteratxoa egiten. Horren arabera, urtxintxak, "belatz bat" eta "azeri bat" ikusi ditu inoiz "afal aurretik egin ohi duen paseotxoan".
"Espero dut orrialde honetan herrialde honek dituen arazo garrantzitsuenei buruzko benetako elkarrizketak izango ditugula. Nik neuk esaten dudana entzun eta zuon istorioak eta iritziak partekatu ahalko dituzue (Gauza dibertigarriak ere izango dira)", erantsi du mezuan.
Mark Zuckerberg Facebookeko presidenteak berak ongietorria eman dio Obamari, orrialdea zabaldu eta ordu batzuetara.
Etxe Zuriak duen estrategia digital berriaren emaitza da fanpage hau. Maiatzean Twitter kontua zabaldu zuten @POTUS izenarekin.
Bere bizitzaren kronologia, iruditan
"Aita, senarra eta AEBko 44. presidentea", Facebookeko orrialdean hala definitu du bere burua Obamak.
"President Obama" orrialdean buruzagiaren bizitzako eta agintaldiko une gogoangarrienak iruditan bildu dituzte. Hala, amarekin agertzen den txikitako argazki bat, Michelle Obamarekin ezkondu zenekoa eta 2005ean Senatura heldu zeneko irudiak bildu ditu kronologia horretan.
