Seriesyonkis portala ez dute 'inola ere' itxiko

Seriesyonkis web orriko jabeak (Burn Media) portala ez dutela "inola ere" itxiko eta David Martinez eta Jordi Tamarko bazkide oihak enpresatik "aspaldi" alde egin dutela argitu du gaur arratsaldean.

"Orain urtebete", Martinezek eta Tamarkok enpresatik alde egin zutela azaldu dute Burn Media enpresako iturriek. Horrez gain, Seriesyonkis orri famatua ez zutela haiek sortu adierazi dute.

Ondorioz, Burn Mediak aurrera jarraituko duela azpimarratu dute, "zerbitzuak hobetuz" eta "bide berriak irekiz".

"Seriesyonkis eta Películasyonkis portalek irekita jarraituko dute, inola ere geldiunerik edo aldaketarik egin gabe".

Goizean, Seriesyonkiseko sortzaileek, David Martinezek eta Jordi Tamagok, enpresa utzi dutela iragarri dute ohar baten bidez. Webgune honen enpresako fundatzaileak direla jakinarazi dute.

"Ez geunden nekatuta eta produktua gustatzen zitzaigun, baina beste erronka batzuk nahi genituen", esan dute.

Oharrean gainera, "mugikorrekin eta gauaren munduarekin lotutako" beste negozio batean lanean hasiko direla diote.

"Abentura honek hasieratik erakarri gintuen eta oso etorkizun oparoa duen proiektu baten partaide izateak asko motibatzen gaitu", dio Jordi Tamargok oharrean.

Albiste honek, SOPA lege proiektuaren aurka milioika webgunek eta Interneteko atarik "itzalaldia" egin duten egunarekin bat egiten du . Enpresa hau lege berriaren "zerrenda beltzean" egongo litzateke.

Martinezek eta Tamargok Burn Media, S.L. enpresaren bitartez kudeatzen zituzten 2009 urtean sortutako Seriesyonkis eta Peliculasyonkis enpresak. Bartzelonan dute egoitza eta negozioa "erabat legezkoa" dela berretsi dute.

Seriesyonkis Espainaiko 21. webgunerik bisitatuena da, Alexa nazioarteko neurgailuaren arabera.