Teknologia -
MegaUploaden itxiera
Erabiltzaileak P2P sareetara itzuli dira
FBIk MegaUpload itxi eta gero, eMuleren eta BitTorrenten erabilera biderkatu egin da.
Erredakzioa
Ostiralean FBIk MegaUpload webgunea itxi zuenetik, erabiltzaileak eMule, BitTorrent, Ares eta beste hainbat P2P saretara itzuli dira artxiboak elkartrukatzeko.
P2P sareek zerbitzaririk gabe funtzionatzen dute, hau da, artxibo trukaketak ordenagailutik ordenagailura eta erabiltzailetik erabiltzailera egiten dira. MegaUpload eta MegaVideo jaio baino lehen, hori zen artxiboak jaisteko modu erabiliena.
Internet Observatory erakundearen grafikoetan ikus daitekeenez, P2P sareen erabilera oso eskasa zen MegaUpload itxi baino lehen, baina FBIren operazioaren ostean, Europako banda-zabaleraren % 15 bete dute.
Horrek erakusten du MegaUploaden itxierak ez duela ekarri deskargen amaiera, baizik eta deskargatzeko ohitura zaharretara itzultzea.
Bigarren grafikoan ageri denez, sare erabiliena BitTorrent da, eta ondoren eMule, Pando eta Ares.
Datu bitxi bat: MegaUploaden itxieraren egunean gehien hazi zen programa IRC txat zerbitzua izan zen, banda-zabaleraren % 0,1 izatetik, % 1,5 izatera pasatu baitzen.
