Zertan dute antza Facebooken sortzaileak eta Appleren fundatzaileek?

Steve Wozniak Appleren fundatzaileetako batek Marck Zuckerberg Facebooken fundatzailea goraipatu du egunotan, eta negozio gizon handia izateaz gain, teknologian aditua dela esan du. Hori horrela, ingeniariak esan du 28 urteko gaztea bere buruaren eta Steve Jobsen arteko nahasketa bat dela.

Egia da Mark Zuckerbergen eta Steve Jobsen bizitzak badituztela hainbat puntu komunean. Steve Jobsek herritarren intereseko produktuak identifikatzen jakin zuen, Steve Wozniakek diseinatutako Mac ordenagailua besteak beste. Wozniak, ordea, isila eta ona zen eta bere sorkuntzak oparitzen zituen.

Applek arrakasta lortu zuenean, enpresako Zuzendaritza ez zen Steve Jobsez fio, konpainiaren sortzaileetako bat izan bazen ere, gazte berezi bat zelako. Hori dela eta, Steve Jobs kaleratu egin zuten 1985ean, baina gero itzuli egin zen enpresa maila gorenera igotzeko.

Mark Zuckerbergek, aldiz, programaziorako gaitasun handia erakutsi zuen Harvarden, 2004an, Facebook sortu zuenean. Garai hartan, Zuckerbergek Wozniaken antza handiagoa zuen. Sare sozialaren sorkuntza ez zen polemikatik kanpo geratu, izan ere, Cameron eta Tyler Winklevoss bikiek ideia kopiatzea leporatu zioten Zuckerbergi.

Sare soziala teknologia munduko maila gorenera iritsi da jendearen intereseko zerbitzuak eskaintzen dituelako. Hala eta guztiz ere, akziodunen kezka nagusia Zuckerbergen adina da, 28 urte besterik ez dituelako. Horrek Steve Jobs ekartzen du gogora. Baina Zuckerbergek aurreikuspen handiagoarekin jokatzen du eta konpainia kontrolpean izaten jarraituko du, burtsara ateratzen denean akzioen % 28 erosteko asmoa baitu.

Hori horrela, Steve Wozniakek, Bloombergen egin dioten elkarrizketa batean, Zuckerbergek Facebooken egin duen lana goraipatu du eta enpresaren akzioak erosiko dituela iragarri.

Bien nahasketa

Wozniakik uste du Zuckerberg bere buruaren eta Steve Jobsen arteko nahasketa bat dela eta talentu handia duela: "Hitz egiten duenean ideia asko ditu erabiltzaileentzat eta produktuarentzat. Miresgarria da".

"Mark Zuckerberg benetako negozio gizona da eta merkatuak ondo ulertzen ditu. Gainera, badaki jendeak zer eskatzen duen", gaineratu du.

Facebooken sortzailearekin alderatuta, Wozniakik dio bera ez zela "nahikoa indartsua" izan. "Ni isila nintzen, ez nintzen ausarta atera eta 'mundua aldatu nahi dut' esateko, baina Steve Jobsekin elkartzeko zortea izan nuen", gogorarazi du.

Wozniakiren arabera, Jobs oso ona zen elektronikan eta salmentetan, baina bera programazioan eta aplikazioen garapenean omen zen trebea. Bien arteko elkarlanak lortu omen zuen Apple maila gorenera eramatea.

Jobsek Zuckerbergi lagundu zion

Asko dira Facebooken sortzailea eta Steve Jobs lotzen dituzten ezaugarriak, eta Wozniakik hori azpimarratu du. Gainera, bien arteko harreman zuzenak ere eman ziren, izan ere, Zuckerbergek berak onartu zuen Steve Jobsek lagundu ziola Facebook sortzeko garaian. Unibertsitateko sare soziala mundu mailako sare soziala bihurtzeko nortzuk lagunduko zioten esan omen zion.