Twitter, uztailaren 5etik aurrera euskaraz

Twitter uztailaren 5etik aurrera erabili ahal izango da euskaraz. Twitterrek iragarri duenaren arabera, sare soziala euskaratzen lagundu duten erabiltzaileek dagoeneko jar dezakete interfazea euskaraz, Beta bertsioan. Euskaraz ez ezik, beste bost hizkuntzatan ere erabili ahalko da Twitter sare soziala: katalana, afrikaansa, txekiera, greziera eta ukrainera.

Joan den maiatzean, Twitterrek edukiak euskaratzeko laguntza eskatu zuen. Horretarako, parte hartu nahi zutenek Twitterreko itzulpen zentrora jo behar zuten. Orain, itzulpen lanak amaitu omen dira eta uztailaren 5etik aurrera sare sozialak euskaraz erabiltzeko aukera eskainiko du.

Twitterren erabiltzen diren eremu urriko hizkuntzei dagokienez, euskara da, Haitiko kreoleraren ondoren, sare sozialean gehien erabiltzen dena. 13.000 erabiltzailek baino gehiagok euskaraz tuiteatzen dute.

#twittereuskaraz etiketa aspaldian erabili dute Twitterreko euskaldunen komunitatean sare soziala euskarara itzultzeko eskakizuna egiten. Erabiltzaile euskaldunek askotan erakutsi dute teknologiaren alorrean euskararen alde lan egiteko prest daudela eta, Twitterren behintzat, helburua betetzea lortu dute.