'Gauzak hobera egiten' hasi direla 'ezkutatzea' egotzi dio PPk PSOEri

Ana Pastor Espainiako Gobernuko Sustapen ministroak "gauzak hobera egiten hasi direla ezkutatzea" egotzi dio PSOEri, eta Mariano Rajoyren Exekutiboak Euskadin abiadura handiko trena eraikitzeko egindako ahalegina "estaltzea" EAJri.

Pastor Bilbon izan da, Europako hauteskundeetako kanpainaren baitan PPk Bilbon egindako ekitaldi batean. Bertan, Arantza Quiroga EAEko PPko presidentea eta Carlos Iturgaiz hautagaia ere izan dira.

Ministroaren esanetan, PPri "herrialdea krisitik ateratzea, aurrekontuak konpontzea eta zorrak ordaintzea egokitu zaio", eta "gauzak hobera egiten hasi diren honetan, sozialistak hori ezkutatzen ari dira".

"Defizit publikoa kontrolatu egin dugula, lehen baino hobeto finantzatzen garela, esportazioak hazi egin direla, turismoak gora egin duela, baliabide gehiago daudela eta enpresak eta lanpostuak sortu direla... hori guztia ezkutatzen dute", nabarmendu du.

EAJri dagokionez, "krisian gauden aurrean, EAEko abiadura handiko trena eraikitzeko Mariano Rajoyren Gobernuak esfortzua egin duela" ezkutatu izana leporatu dio Pastorrek.

Arantza Quirogak ere jeltzaleen aurka egin du. Horren hitzetan, EAJ "ezkutatuta" dago eta horrek "atzeratu" egingo du krisiaren konponbidea.