Hauteskunde Orokorrak -

Kanpainaren hasiera

Nafarroako alderdiek Foru Erkidegoan jarri dute arreta

Besteak beste, puri-purian dagoen lurralde politika izan dute hizpide Kongresurako eta Senaturako hautagaiek.

Nafarroa, Espainiako Estatuan. Argazkia: Efe
Nafarroa, Espainiako Estatuan. Argazkia: Efe
Nafarroa, Espainiako Estatuan. Argazkia: Efe

agentziak | erredakzioa

Whatsapp Facebook Twitter Telegram Email

Sergio Sayas Na+en (Navarra Suma) hautagaiak, UPNk, Ciudadanosek eta PPk osatzen duten koalizioko beste kide batzuekin batera, adierazi du Foruen Monumentua "Nafarroaren indarra eta harrotasuna" irudikatzen dituen "leku sinbolikoa" dela.

Sayasek hauteskunde orokorren kanpaina hasierako ekitaldian azaldu duenez, "Nafarroa eta Espainia" defendatuko dituzten alderdien alde egin beharra dago hauteskundeetan, "irtenbideak ematen dituztenak, eta segurtasuna bermatzen dutenak".

"Printzipioak eta konpromisoak dituztenak, hauteskundeen biharamunean konpromisoak baztertzen ez dituzten" alderdien alde egin du.

Sayasek gaineratu du "independentista kataluniarrak Kataluniako kaleak txikitzen" ari direnean, Jarduneko Gobernuarekin, Parlamentua deseginda, eta "printzipioei uko egin dien" PSOErekin egingo direla hauteskundeak.

PSN

PSNk Iruñeko egoitzan egin du kanpaina hasteko ekitaldia, eta mobilizaziorako deia egin die herritarrei, eskuindarrek agindu ez dezaten.

Maria Chivite PSNren idazkari nagusia Santos Cerdan eta Toni Magdaleno Kongresuko eta Senatuko hautagaiak izan ditu aldamenean, eta kanpaina "labur" hau Nafarroarentzat bereziki garrantzitsua dela azpimarratu du.

Chivitek azaldu duenez, hauteskunde hauetan "ze gizarte, ekonomia eta lurralde eredu nahi dugun, baina bereziki gure herrialdearentzat ze bizikidetza eredu nahi dugun" erabakiko da.

Horregatik, kalitatezko enplegua, berrikuntza, balio erantsia eta fiskalitate justua defendatzen duen ereduaren eta "lan prekarietatea, enpleguaren kalitate galera eta soldata jaitsiera" babesten duen ereduaren artean aukera egin behar dela adierazi du.

Elkarrekin Podemos

Nafarroako Elkarrekin Podemoseko kideek Iruñeko Gaztelu Plazan hasi dute kanpaina, eta Foru Erkidegoarentzat azaroaren 10ean asko dagoela jokoan ohartarazi dute.

Kartelak itsasteko ekitaldi sinbolikoan parte hartu dute Ione Belarra eta Neniques Roldan Kongresurako eta Senaturako hautagaiek, Eduardo Santos alderdiaren idazkari nagusiarekin batera. 

Belarrak azpimarratu du "Nafarroan asko" dagoela "jokoan": "Jokoan dago krisi ekonomiko berri baten aurrean berriro autogobernua gal dezakegula, gure jendearen eskubide sozialak bermatzeko gaitasuna galtzeko arriskua, horixe egin baitzuten PPk eta PSOEk aurreko krisi ekonomikoan".

"Azaroaren 10etik aurrera jendea babestuko duen eta murrizketak goitik egingo dituen Gobernu duin bat egoteko berme bakarra Elkarrekin Podemos indartsua edukitzea da", azpimarratu du.

EH Bildu

Bel Pozueta EH Bilduren hautagaiak, bere aldetik, hauteskundeotan eserlekua lortzeko aukera "erreala" dela azpimarratu du, aurrekoetan helburutik 408 botora geratu ostean.

"Nafarroako sektore euskaldunari, feministari, subiranistari eta ezkertiarrari ahotsa emateko aukera dugu", eta "oso argi dugu Kongresuan eta Senatuan entzun nahi ez bagaituzte ere, entzun egingo gaituztela", adierazi du Pozuetak, bere jardunaren "erdigunean pertsonak eta herritarren beharrak" egongo direla hitzeman aurretik.

Hori horrela, EH Bilduk Madrilen "pertsona guztien eskubideak defendatu" behar dituela eta "gizarte osoaren mesedetan" lan egin behar duela berretsi du. "Nafarroa erkidego hutsean bihurtu nahi dutenen aurrean, autogobernua eta Nafarroaren burujabetza" defendatuko dituela, eta "gizarte politikak karga bat direla eta feminismoa moda bat dela pentsatzen dutenei emakumeen eskubideak ezin direla zapaldu" esango diela gaineratu du.

Geroa Bai

Geroa Baik bere egoitzan hasi du kanpaina, Iruñean, "etorkizuna eraikitzeko" helburuarekin, adierazi du Uxue Barkosek Maria Solana eta Esther Cremaes Kongresurako eta Senaturako hautagaien aurkezpenean.

Creamesek akordio politikoa eta elkarrizketa jarri ditu "Geroa Baik erabili dituen eta erabiliko dituen tresna" gisa.

Hauteskunde errepikapenaren harira, Solanak esan du politikari "maskulino batzuen ezintasuna" izan dela erruduna, ez dutela "maila" eman.

Solanak Cremaesek Iruñeko Udalean "une oso zailetan" egin duen lana goraipatu du, eta Uxue Barkosek Kongresuan egindakoa ere izan du hizpide: "Aznarri eta Zapaterori aurre egiten zien".

Hau zure interesekoa bada, baliteke beste gai hauek ere izatea
Diputatuen Kongresua Politika PP UPN PSN Geroa Bai Nafarroa Uxue Barkos argazkiak EAEko hauteskundeak Hauteskunde orokorrak Espainiako Gobernua Espainia Hauteskundeak AEB Alderdi politikoak EH Bildu Nafarroako Ciudadanos Eguneko albisteak Albisteak Podemos Ahal Dugu Nafarroa Hauteskundeak Hauteskunde Orokorrak Emaitzak Navarra Suma Hauteskunde inkestak Nafarroako Gobernuko lehendakaria Senatua