Elkarrekin Podemosek 'ezkerraren batasunari' etekina atera diola uste du Martinezek

Barne batasunari dagokionean, koalizioak unerik onena bizi ez duela onartu du Lander Martinez Podemos Euskadiko idazkari nagusiak, baina "hanka-sartzeak" eginda ere, Euskadin Elkarrekin Podemosek "markari eta proiektuari Estatuan baino etekin handiagoa atera dio, ezkerreko batasunaren aldeko apustu argia egin delako".

Ezker Anitza-IU eta Equo Berdeak indarrekin batera osatutako koalizioaren hauteskunde emaitzak aztertu ditu Martinezek. Zenbait udaletan "gobernuaren giltza" izango direla ziurtatu du buruzagi moreak, besteak beste, Errenterian, Durangon eta Andoainen. Akordio "programatikoak" ixten baldin badituzte EH Bildurekin gobernatuko lukete.

Isabel Salud Ezker Anitza-IUko koordinatzaile nagusiarekin eta Ramon Sanchez Equo Berdeetako bigarren bozeramailearekin batera agerraldia egin du Martinezek koalizio morearen egoitzan. "Gure txokoa aurkitzea eta gure proposamenak nahikoa entzutea lortu ez dugula bistakoa da, kanpaina EAJren eta EH Bilduren arteko lehia bezala planteatu dutelako", azpimarratu du.

"Barneko borrokek" eragin ahal izan dietela "gogoan hartu" du koalizio moreko buruzagiak. Zentzu horretan, "barne zatiketarik gabeko antolakuntza" bat lortzeko pertsonalki lan egin duela gogorarazi du.

Bestalde, Pedro Sanchezekin koalizioko Gobernu bat osatzea edo maila guztietan (erkidego eta udaletan) gobernagarritasunerako bloke bat sortzea eskatu du Pablo Iglesias Podemoseko idazkari nagusiak, nahiz eta atzoko hauteskundeetan emaitzak txarrak erdietsi zituztela onartu.

Hauteskundeetako emaitzak "txarrak" izan direla eta duela hilabete batekoekin (orokorrak) alderatuta "atzera" egin dutela onartu du Iglesiasek. Horrela, pozik ez daudela eta autokritika egitea egokitzen zaiela azaldu du, baina "pisu estrategiko ikaragarria" izaten jarraitzen dutela zehaztu du, Estatu, erkidego eta udal mailan bloke progresistako gobernuak eraikitzeko.

Prentsaurreko laburra eman du Iglesiasek. Datozen asteetan Estatuko Hiritarren Kontseilu berri bat deituko duela iragarri du, hauteskundeetako emaitzak aztertzeko. Ezkerraren zatiketak, Madrilgo Udalean zein erkidegoan, babesa "kendu" diela errepikatu du.

"Borrokan ari garenean eta zatituta gaudenean ezkerrari ez zaigu funtzionatzen. Guztiek autokritika egin beharko dugu eta zatiketak babesa kentzen duela jakin", nabarmendu du.

Pablo Iglesias Podemoseko idazkari nagusia. Argazkia: EFE/Luca Piergiovanni