13:43

Gasteiz

Asteartean jazo zen

Gasteizko Polizia Gamarran zabarkeriarik egon ote zen ari da aztertzen

Agentziak | Erredakzioa

Lau urteko ume bat itotzeko zorian egon zen; oso larri dago, Gurutzetako Ospitalean.

  • Gamarrako igerilekuak, artxiboko irudian. Argazkia: Luis Angel Perez.

    Gamarrako igerilekuak, artxiboko irudian. Argazkia: Luis Angel Perez.

  • Whatsapp
  • Whatsapp
  • telegram
  • Bidali

Gamarrako igerilekuetan asteartean jazotako istripua argitzea xede, Gasteizko Poliziak eginbideak zabaldu ditu. Lau urteko ume bat itotzeko zorian izan zen, eta Poliziak aztertu nahi du ea zabarkeriarik egon ote zen haren zaintzaileen aldetik.

Arabako hiriburuko udal-iturriek Eferi jakitera eman diotenez, umea bi heldurekin joan zen igerilekuetara: izeba batekin eta emakumearen bikotekidearekin.

Hala ere, 14:40an, familia-igerilekuaren barruan zegoen bainulari batek abisua eman zuen; izan ere, mutikoa ur gainean zegoen, ahoz behera, uretan sartzeko eskailera batzuen ondoan.

Gasteizko Poliziak ez du istripuaren beste lekukorik aurkitu, umea ur gainean topatu zuena izan ezik. Zaintzaileak ez zeuden berarekin, istripua jazo zenean, eta, hortaz, horiek zabarkeriaz jokatu zuten zehazten saiatuko dira eginbide horien bidez.

Umea uretatik atera zutenerako, birikak eta bihotza geldituta zituen. Oso larri dago, Zainketa Intentsiboetako Unitatean, Gurutzetako ospitalean, Eferi osasun-zentro horretako iturriek gaur jakinarazi diotenez.

Jokabide "zuzena", sorosleen eta erizainaren aldetik

Kontsultatutako udal-iturrien arabera, sorosleen eta erizainaren jokabidea "zuzena" izan zen, umea artatu zutenean.

Tenperatura altuak zirela-eta, Gamarrako sorosleen zerbitzua indartuta zegoen, ohi baino bi sorosle gehiagorekin. Neurri hori eguraldi-iragarpenak egun oso beroak aurreikusten dituenean hartzen dute, halakoetan erabiltzaile gehiago egoten baitira.

Istripua jazo zenean, hiru sorosle zeuden igerilekuak zaintzeko: bi, txirristak zaintzen, eta beste bat, basoari begira. Igerilekuko erizainak eta sorosleek suspertze-teknikak erabili zituzten, eta anbulantzia baten laguntza eskatu zuten; umeari arnasa hartzen laguntzeko hodi bat sartu zioten bertan, eta haren bizi-konstanteak monitorizatu zituzten.

Egonkor zegoela ikusita, Txagorritxu Ospitalera eraman zuten, baina bertako medikuek Gurutzetako Ospitalera, Barakaldora (Bizkaia), eramatea erabaki zuten. Bertan dago ordutik.

Iruzkinak

  • Publizitatea
    Publizitatea
    Publizitatea
    Publizitatea
    Publizitatea

    Bisitatuena

      Kargatzen ikusiena
      Kargatzen ikusiena