Itxi

Reala

2-3

Realak garaipena lortu du Granadaren aurka, emaitza iraulita

A. B. E. | EITB Media

Talde txuri-urdinak 2-3ko emaitzarekin irabazi du Carmenes zelaian jokatu duen Santander Ligako 6. jardunaldiko partida. Imanolek zuzentzen duen taldea galtzen hasi da, baina aurkariaren hasierako golari buelta ematea lortu du.

0
Granada vs Real Sociedad: Santander Ligako laburpena, golak eta jokaldirik onenak

Realak garaipena lortu du Granadaren aurka (2-3) Carmenes zelaian ostegun honetan jokatu duen Santander Ligako seigarren jardunaldiko partidan. Hiru puntuak lortuta, talde txuri-urdina hirugarren da sailkapenean 13 punturekin, Real Madril liderrarekiko hiru puntura.

Norgehiagoka erritmo biziarekin hasi da, eta Realak izan du lehen abagunea bosgarren minutuan; hala ere, Maximiliano atezainak txuri-urdinen gola eragotzi du, Sorlothek area barrutik egin duen jaurtiketa desbideratuta. Granadaren erantzun lau minutu beranduago iritsi da, eta talde andaluziarrak gola sartu du partidan izan duen lehen abagunean; Rochinak kornerra atera, Germanek errematea egin, eta Guevarak bere atean sartu du baloia (1-0).  

Neurketa maldan gora jarri zaion arren, Realak berdinketa lortzeko abagunea izan du 11. minutuan, baina Sorlothen errematea kanpora joan da, oso gutxigatik. Ondoren, Granada izan da baloiaren jabe, baina atsedenaldira iritsi aurreko azken 15 minutuetan, talde txuri-urdinak lehia berdintzeko aukerak izan ditu: Maximiano atezainak erantzun ona eman dio Robert Navarroren jaurtiketari 33. minutuan, eta ,hurrengo jokaldian Mikel Merinok alferrik galdu du gola sartzeko aukera paregabea.

Reala atsedenaldira gol bateko desabantailarekin joan den arren, bikain ekin dio bigarren zatiari Imanol Alguacilek zuzentzen duen taldeak. Erasokor zelairatu dira txuri-urdinak, eta partida berdintzea lortu dute 52. minutuan; Realak kornerra atera, eta Aritz Elustondok banakoa jarri du markagailuan (1-1), penalti puntuan egin duen errematea sare barrura bidalita.

Granadak azkar erantzun du gola hartu ostean, eta berriro aurrea hartzeko aukera izan du, baina Nevak boleaz egin duen errematea kanpora joan da. Andaluziako taldeak bigarren gola sartzeko abagune argia izan du, barkatu egin du, eta Realak 2-1ekoa sartu du Mikel Merinoren bidez, 60. minutuan; Oyarzabalek jaurtiketa egin du area kanpotik, Domingos Duartek desbideratu du, baloia solte geratu da area barruan, eta Merinok ez du barkatu aurkariaren ate aurrean.

Pozak, ordea, hamar minutu besterik ez dio iraun Realari, 70. minutuan Guevarak falta egin baitio area barruan Baccari, epaileak penaltia adierazi du, eta Luis Millak binakoa (2-2) jarri du markagailuan, penaltiz Ryan atezaina gaindituta.

Partidaren azken txanpan bi taldeek erasora jo dute, garaipena lortzeko helburuarekin. Lehia horretan Reala atera da garaile, Aritz Elustondok gola sartu (2-3) baitu 82. minutuan; Januzajek area barruan egin duen errematea Maximiano atezainak desbideratu du, balioa Elustondok jaso, eta jokalari txuri-urdinak egindako jaurtiketak Granadako atezaina gainditu du.

Amaierako minutuetan Realak ondo eutsi dio Granadari, ez dio aurkariari aukerarik eman, eta hiru puntuak eskuratu ditu.  

Fitxa teknikoa:

2. Granada: Maximiano; Arias, Domingos Duarte, German, Carlos Neva; Gonalons, Luis Milla, Montoro; Rochina (Bacca, 66. min), Machís (Antonio Puertas, 24. min) eta Luis Suarez.

3. Reala: Ryan; Zaldua (Zubeldia, 76. min), Aritz, Le Normand, Aihen; Guevara, Navarro (Valera, 6. min5), Merino; Portu (Januzaj, 65. min), Oyarzabal (Zubimendi, 76. min) eta Sorloth (Lobete, 76. min).

Golak: 1-0, (9. min) Germán. 1-1, (52. min) Aritz. 1-2, (60. min) Mikel Merino. 2-2, (70. min) Luis Milla 2-3, (82. min) Aritz.

Epailea: Pizarro Gomez. Txartel horiak atera dizkie Luis Suarez (28. min), Rochina (36. min), Domingos Duarte (50. min), Arias (64. min) eta German (72. min) Granadako jokalariei, baita Le Normand (72. min) Realeko futbolariari.