Euroguneko ekonomiak % 0,6 egingo du atzera 2013an, EBZren arabera

Euroguneko ekonomiaren atzeraldia aurreikusitakoa baino handiagoa izango da 2013an; izan ere, Europako Banku Zentralak (EBZ) jakinarazi duenez, % 0,6 egingo du atzera ekonomiak, martxoan % 0,4 egingo zuela aurreikusi arren.

Mario Draghi Europako Banku Zentraleko presidenteak prentsaurrekoa eskaini du gaur, eta horren arabera, esku artean dituzten datu ekonomiko guztiak aztertuko dituzte, eta prest daude neurriak hartzeko.

Halaber, euroguneko herrialdeetako ekonomia 2014an % 1,1 haziko dela aurreikusi du EBZk; martxoan, aldiz, % 1 haziko zela aurreikusi zuen. Hala, ekonomia pixkanaka-pixkanaka suspertzen hasiko da.

Euroguneko ekonomiak % 0,2 egin du atzera urteko lehen hiruhilekoan, eta atzeraldia izan da azken sei hiruhilekoetan.

Hazkundea uste baino txikiagoa izango den beldur da EBZ, barne eskaria eta kanpo eskaria jaitsi daitezkeelakoan eta euroguneko herrialdeetan egindako egiturazko aldaketek eragina izan dezaketelakoan.

EBZren arabera, euroguneko inflazioa % 1,4koa izango da 2013an, martxoan % 1,6koa izango zela iragarri zuen arren.