Lagarde: 'EBZren programa ez da nahikoa ekonomia suspertzeko'

Christine Lagarde Nazioarteko Diru Funtsaren (NDF) zuzendari nagusiak zorionak eman dizkio Europako Banku Zentralari (EBZ) ostegunean abiatutako zor publiko eta pribatua erosteko programarengatik eta iragarpena egiteko moduarengatik baina, ohartarazi duenez, "ez da nahikoa Europako ekonomia suspertzeko".

"Ez dut uste Europako ekonomiari bultzada emateko eta hazkundea sustatzeko nahikoa denik", agertu du France 2 telebista frantziarrari eskainitako elkarrizketa batean.

Izan ere, haren ustean, "lehiakortasun estrukturala hobetuko duten erreforma sakon estrukturalak behar dira".

Erreforma horiek zeintzuk izan behar diren galdetuta, hainbat arlo liberalizatzeko proposatzen duen Emmanuel Macro Frantziako ekonomia ministroaren lege proposamena aipatu du Lagardek baina baita Espainian edo Italian egindakoak ere: "Espainiak erreforma sakonak egin ditu eta Italia ere hasia da lan horretan".

Orain EBZren programak ekonomian duen eragina aztertu beharrekoa dela uste du Nazioarteko Diru Funtsaren buruak. "Bankuek maileguak emateko, herritarrek gastatzeko eta enpresak inbertitzeko nahikoa konfiantza ote duten ikusi behar da orain", erantsi du. Lagarderen irudiko, "hitz gakoak konfiantza eta ziurtasuna dira".