Ekonomia -
Etxebizitzak
Etxebizitzen gaineko hipotekak % 22 igo ziren EAEn 2015ean
Nafarroa da joan zen urtean igoera txikiena izan zuen erkidegoa, % 2,5 besterik ez.
Agentziak | Erredakzioa
Etxebizitzak erosteko hipoteka berrien sinadurak % 22 areagotu ziren Euskal Autonomia Erkidegoan (EAE) 2015ean; izan ere, 13.992 mailegu egin ziren, eta, horrela, azken urteetako joera negatiboa eteten da.
2015ean aurreko urtean baino 2.530 hipoteka gehiago sinatu ziren. 2014an urtean, hipoteken sinadura-kopurua jaitsi egin zen, baina aurreko urteetan baino askoz gutxiago: 2014an, % 5,6ko jaitsiera egon zen; 2013an, % 34,6koa; 2012an, 26,2koa; azkenik, 2011n, % 21ekoa.
Estatistikako Institutu Nazionalak gaur plazaratu dituen datuen arabera, joan zen urtean gora egin zuten hipoteka berriek, eta 1.778 milioi euro eman ziren maileguan, 2014an baino % 28,9 gehiago.
Joan zen urtean erkidego guztiek areagotu zuten hipoteken sinaduren zenbatekoa: Balear uharteak, % 41,4; Kataluniak, % 25,9; Kantabriak, % 24,9; Murtziak, % 23,7. Horien atzetik EAE azaltzen da, gehien hazi zen erkidego gisa.
Nafarroa, gutxien hazi zen erkidegoa
Nafarroak etxebizitzak erosteko 3.804 hipoteka sinatu zituen 2015ean, eta horrek % 2,5eko igoera adierazten du; ondorioz, hazkuntza txikiena izan zuen erkidegoa izan zen.
Mailegatutako zenbatekoa 391 milioi euro izan zen, iaz baino % 2,1 gehiago.
Hipoteken kopurua guztira
EAEn guztira 20.443 finka hipotekatu ziren joan zen urtean, 3,007 milioi euroko kapitalarekin. Nafarroan, berriz, 5.373 hipoteka sinatu ziren finken gainean, 729 milioi euroko kapitalarekin.
