Burtsak BBVA eta CaixaBank zigortu ditu, mozkinek behera egin ondoren

BBVA eta CaixaBank bankuen mozkinek behera egin zuten 2016ko lehen hiruhilekoan, iazko epe bereko datuekin alderatuta. Inbertitzaileek bi entitateak zigortu dituzte; izan ere, % 8 eta % 4 inguru galtzen ari dira Burtsan.

CaixaBankek 273 milioi euroko irabazia lortu du lehen hiruhilekoan, iaz baino % 27,2 gutxiago, bankuak jakitera eman duenez. Barclays Bank SAU entitatearen bat-egiteak “ondorio bereziak” izan dituela azaldu du.

Bestalde, BBVAk 709 milioi euroko mozkinak lortu ditu 2016ko lehen hiruhilekoan, iaz baino % 53,8 gutxiago. Horren eragileen artean, kanbio-tasa, finantza operazioengatik jasotako diru-sarreren beherakada eta ezohiko diru-sarreren falta aipatu ditu bankuak.

Balore Merkatuaren Batzorde Nazionalari igorritako agiri batean, 2015eko urtarrila eta martxoa artean, Txinako CNCB bankuan zuen parte-hartzearen zati bat saldu eta horrek kontuak bultzatu dituela gogorarazi du BBVAk.

Espainian, BBVAk 234 milioi euro irabazi zituen martxora arte, iaz baino % 23,6 gutxiago. Higiezinen unitateak 113 milioiko galerak izan zituela erantsi du, nahiz eta 2015eko martxoan izandakoak baino % 26,5 gutxiago izan.

2015eko apirilean Catalunya Banc erosi ondoren, gastuek % 14,4 egin zuten gora. Herrialde batzuetako inflazio handiak, dibisek eta hazten ari diren merkatu batzuetan egindako inbertsioek ere gastua areagotu zuten, BBVAk azaldu duenez.

BBVAk 49 milioi euro irabazi zituen AEBetan (% 62,5 gutxiago); beste 133 milioi, Turkian (% 3,4 gutxiago); 489 milioi, Mexikon (% 6,9 gutxiago) eta 182 milioi, Hego Amerikan, Venezuela barne (% 19,6 gutxiago).