Ekonomia -
GOI-BILERA
Diru merkatuaren 'egonkortasuna' aldarrikatu du G7ak
Munduko zazpi ekonomia garatuenen finantza buruzagiak Sendain (Japonia) daude, 2011ko lurrikarak eta ondorengo tsunamiak suntsitutako eremuan.
Agentziak | Erredakzioa
G7 taldeko Finantza ministroek diru merkatuan "egonkortasuna" egon behar dela aldarrikatu dute, gaur Japoniako Sendai herrian hasitako goi-bileran.
Munduko zazpi herrialde garatuenen Finantza ministroek eta horien banku zentraletako buruek agendako lau gaietako bat baino ez dute hartu hizpide gaur: ekonomiaren sustapena eta arriskuak, herrialde azaleratu berrien hazkundea moteldu den honetan.
Horren ildotik, G7ko kideek diru merkatuan gora-behera handirik ez egotea eta debaluazio lehiakorrak saihestea babestu dute.
Bileran Europar Batasuneko, Eurotaldeko eta NDFko ordezkariak ere izan dira, eta egiturazko erreformak egitearen alde egin dute.
Pierre Moscovici Europako Batzordeko Ekonomia komisarioak kapital mugimenduak ere defendatu ditu, ekonomia sustatzeko helburuz. Horren ildotik, Europako Inbertsio Plana dagoeneko martxan dela nabarmendu du.
