Lan erregulazioa enpresaren lapurretak ordaintzeko dela esan dute langileek

Productos Tubulareseko langileek manifestazioa egin dute gaur goizean, Sestaoko altzairutegitik abiatu eta Barakaldora arte. Enpresak aurkeztutako "lan-erregulazio espediente basatia zuzendaritzak eragindako gehiegikeriak eta arpilatzeak ordaintzeko" erabili dadin lan egitea leporatu diote Arantxa Tapia Garapen Ekonomikorako sailburuari.

Productos Tubulareseko zuzendaritzak lan-erregulazio espedientea aurkeztu zuen orain dela hainbat aste. Horren arabera, 420 langileetatik 157 kaleratzea aurreikusi du enpresak eta soldata % 25 gutxitu, urtean 1.704 lanordu ezartzeaz gain (orain arte 1.680 ziren).

Langileen seme-alabek eraman dute manifestazioko pankarta, 'Eta guk zer jango dugu? 400 familia arriskuan' ('¿Y nosotros qué comemos? 400 familias en peligro') lelopean. Barakaldoko Udalean amaitu dute martxa, 13:15 aldera.

"Ezbeharra" ekarri duela leporatu diote langileek Guillermo Ulacia Productos Tubulareseko presidenteari, "ez dadila kaleratzerik egon" eskatzeaz gain.

Barakaldora iritsi direnean, langileei eta familiartekoei mobilizaziora joateagatik eskerrak emateaz gain, "enpresaren eta haren lagun-taldearen gelditasuna" gaitzetsi du enpresa-batzordeak. Horrez gain, "haien helburuekin jarraitzeko" asmoa dutela salatu du.

Bestalde, egungo egoeraren arduradun nagusia dela egotzi dio BBVAri (enpresako akzioduna), kredituak ematerakoan, interesak kobratzerakoan eta haien irabazietan gure izerdia eramanez erakutsitako diru-gosearen ondorioz.