Ekonomia -
IRUÑEA
Volkswagen T-Cross berria Landabenen egingo dute
Iruñeko lantegiak Polo modeloa egiten du orain. Urte amaieran bigarren modelo hori egiten hasten denean, 350.000 ibilgailu egingo ditu urtean.
AGENTZIA | ERREDAKZIOA
Volkswagen autogile alemaniarrak iragarri duenez, bigarren modelo bat egingo du urte amaieratik aurrera Iruñeko Landaben industrialdean duen lantegian: T-Cross berria. Polo modeloa egiten jarraituko du eta beste ibilgailu hori egiteari ekiten dionean, 350.000 ibilgailu egingo ditu urtean (egun, 244.000 egiten ditu).
Autogile alemaniarrak egindako kalkuluen arabera, langile kopurua % 10 haziko da Iruñeko lantegian T-Cross berria ekoitzi ahal izateko.
Andreas Tostmann Volkswageneko logistika buruak adierazi duenez, "T-Cross eta Polo modeloek plataforma modularra partekatzen dute, eta, hori dela eta, efizientzia alorrean abantailak lortuko dira biak Nafarroan eginda".
Alemaniako enpresak 1.000 milioi euroko inbertsioa egingo du 2019ra arte T-Cross eta Polo modeloak Nafarroan ekoizteko.
Emilio Saenz Landabengo fabrikako zuzendaria pozik agertu da erabakiarekin. Urte amaieran hasiko dira T-Cross berria (Polo autoaren SUV bertsioa) ekoizten.
