Patxi Lopez Abu Dhabin: 'Hemen egon zaitezten lagunduko zaituztegu'

Patxi Lopez lehendakariak energia berriztagarrien alorrean Euskadik duen indarra eta lidergoa aldarrikatu du Abu Dhabin, eta herrialde asiarrera joan nahi duten euskal enpresei laguntzeko prest agertu da.

Horixe adierazi du lehendakariak Arabiar Emirerrietan dagoeneko egoitzak dituzten enpresarien aurrean, eta lehenengo aldiz, lehendakariarekin bidaia ofizialean Abi Dhabira joan direnen aurrean.

Patxi Lopezen esanetan, euskal enpresek harrotasunez daramatzate Euskadiren izena eta bertako baloreak: seriotasuna lanean, gauzak ongi egiteko konpromisoa eta esfortzua. Lehendakaria gustura agertu da indarrak batuz eta Euskadirentzat hoberena dena bilatuz, herri osoaren eskaintza bat delako. "Hemen egon behar dugu eta lagundu egingo zaituztegu lan horretan", azpimarratu du Patxi Lopezek. "Euskadiren indarrak eta esperientziak leku garrantzitsua izan behar du hemen", gaineratu du.

Lehendakariarekin batera 80 enpresatako ordezkariak joan dira Abu Dhabira, horietako askok aurretik ere harremana zuten hango merkatuarekin, baina aukerak aprobetxatzeko harremanetan sakontzeko helburua dute. Horietako bat INCOESA da, Bedian egoitza duen enpresa, elektrizitate hornikuntzan eta ekipamenduan espezializatua.

Jon Arteta presidenteordeak EiTBri jakinarazi dionez, nazioarteratzea eta merkatu berriak bilatzea ezinbestekoa da Espainiako merkatuaren geldiunea kontuan izanda.

Gaur, euskal ordezkaritzak azken hartu-eman batzuk izango ditu Abu Dhabin, eta gero Qatarrera joango da.