Bizkaibuseko langileen lanuztea erabateko jarraipena izaten ari da

Lanuzte eguna dute gaur Ezkerraldean eta Enkarterrin zerbitzua eskaintzen duten Ezkerraldea Meatzaldea Buseko (EMB) langileek. Sindikatuen hitzetan, goizeko lanuzteek erabateko jarraipena izan dute.

Atzo bezala, gaur ere txanda bakoitzeko bi orduko lanuzteak egitera deitu dituzte langileak: 07:30etik 09:30era eta 18:00etatik 20:00etara.

Sindikatuen esanetan, oraindik ez dute enpresen aldetik deirik jaso. Halaber, biharko manifestazioa deitu dute Bilbon.

Eusko Jaurlaritzak ezarritako gutxieneko zerbitzuak (% 30) bete egin dira, sindikatuen arabera. Gutxieneko zerbitzuak Bizkaibuseko webgunean zehaztu dituzte.

Ostegunean, abenduaren 13an, lanuzteak egingo dituzte berriro, eta Pesalur enpresako langileekin bat egingo dute orduan. Enpresa horretako langileek Durangaldean, Arratian eta Nerbioi Garaian eskaintzen dute zerbitzua, eta 4 orduko lanuzteak egingo dituzte orduan.

EMBko beharginek abenduaren 17an eta 20an ere egingo dituzte lanuzteak, eta Pesalurrekoek, abenduaren 17an baino ez.

Lanuzte horiez gain, 24 orduko greba egingo dute abenduaren 21ean, San Tomas egunean. Bilbobuseko langileek ere iragarri dute greba egun horretarako.