Ekonomia -
EAE
Eragiketa bakoitzeko gutxienez 2.000 euroko laguntza aurreikusten du 'Renove planak'
Arantxa Tapia Ekonomiaren Garapena eta Azpiegituretako sailburuaren arabera, "teknologia guztietarako tartea dago", baita dieselerako ere. 10 urte baino gehiagoko autoak ordezkatuko ditu planak.
Agentziak | Erredakzioa
Autoak berritzeko 'Renove planak' bakoitzean 2.000 euroko laguntza aurreikusten du eragiketa bakoitzeko, Arantxa Tapia Ekonomiaren Garapena eta Azpiegituretako sailburuaren arabera. Ibilgailu berrien salerosketa pizteko helburua du Eusko Jaurlaritzaren planak.
El Diario Vasco kazetari emandako elkarrizketan, Tapiak esan du ekonomiaren dezelerazioak kezkatuko lukeela "Euskadin bakarrik balitz, baina ez da horrela, eta egoera orokor bati buruz hitz egiten ari gara". "Euskadik hazten jarraituko du; bizkorrak eta malguak izan behar gara, eta etorkizunerako prest egon", gehitu du.
Aste honetan iragarritako 'Renove planak' 10 urte baino gehiagoko autoak ordezkatzea du helburu. Horrekin "Euskadiko ibilgailuak berriztatzea eta automobilgintzari laguntzea, herrialderako garrantzitsua baita".
Zehaztu duenez, 5 milioi euroko aurrekontua izango du planak, Energiaren Euskal Erakundearen kontu, eta edozein teknologia duten ibilgailuak lagunduko du diruz; "eragiketa bakoitzeko, 2.000 euro inguru".
Dieselari buruz galdetuta, Tapiak esan du "teknologia guztietarako tartea eta lekua" daudela, eta "trantsizio ordenatuta eta lasaia bilatu" behar dela.
