Ekonomia -
LAN-GATAZKA
Aenak lana berrantolatu du Bilboko Aireportuan, igandeko greba-deialdia tarteko
Orain arte greba-egun bat egin dute udan, uztailaren 1ean, eta hogei hegaldi gelditu ziren bertan behera. Uztailaren 7ko eta 15eko lanuzteak deituta bazeuden ere, normaltasuna izan zen nagusi.
AGENTZIAK | ERREDAKZIOA
Uztailaren 21ean Bilboko Aireportuan deitutako grebaren harira, Aena bertan aritzen diren hegazkin konpainiekin lanean ari da igandeko operatiboa berrantolatzeko.
Aenak jakinarazi duenez, bertan behera geldituko diren hegaldietako bidaiariei ahalik eta eragozpen gutxien eragitea eta une oro horiei informazio zehatza ematea da helburua. Bertan behera geldituko diren hegaldien zerrenda izan bezain laster, aire-konpainiek eta Aenak horren berri emango diete kaltetuei.
Sindikatuek 24 orduko greba-egunak eta lanuzteak deitu dituzte uda honetarako: 24 orduko greba, uztailaren 1ean, 7an, 14an, 21ean, 25ean, 28an eta 31n, abuztuaren 4an, 11n, 15ean, 18an, 25ean eta 31n eta irailaren 1ean; 6 orduko lanuztea, ostera, uztailaren 15ean eta 24an eta abuztuaren 1ean eta 14an.
Orain arte greba-egun bat egin dute udan, uztailaren 1ean, eta hogei hegaldi gelditu ziren bertan behera. Uztailaren 7ko eta 15eko lanuzteak deituta bazeuden ere, sindikatuek atzera egin zuten zuzendaritzarekin negoziatzeko.
Sindikatuek langile gehiago eskatzen dituzte Bilboko Aireportuan izandako lan-kargaren gorakadari aurre egiteko. Grebarekin bat egitera deitutako langileen artean daude bezeroen arreta zerbitzuaz, operazioez eta seinaleztatzeaz arduratzen direnak, eta baita suhiltzaileak ere.
