Ekonomia -
Lan-gatazka
Metro Bilbaok idatziz jasoko ditu sindikatuen eskari zehatzak
Astelehenean entregatuko diote Zuzendaritzari eta horrek asteartean aztertuko du "gatazka amaitzea eta lanuzte gehiago saihestea" helburu.
Erredakzioa
Metro Bilbaok jakitera eman duenez, sindikatuen aldarrikapen zehatzak jasoko dituzte datorren astelehenean idatzi batean eta asteartean aztertuko dituzte "gatazka amaitzeko eta lanuzte gehiago saihesteko".
Metro Bilbaok agiri batean azaldu duenez, enpresa batzordeak bilera egin zuen atzo eta proposamen "zehatza eta adostua" egiteko konpromisoa hartu zuen.
Sindikatuen proposamena berretsi beharko dute langileek datorren asteleheneko asanbladan. Konpainiak garrantzia handia eman dio horri, asanblada baita lanuzteak deitu ala ez erabakitzen duena.
Metro Bilbaok salatu du orain arte sindikatuen aldarrikapenak hedabideetatik eta herritarren artean banatutako panfletoetatik jaso dituztela.
Enpresaren zuzendaritzak eta enpresa batzordeak bilera egin zuten atzo eta sindikatuek errefusatu egin zuten Metroaren proposamena, herritarren artean banatutako panfleto batean zeuden aldarrikapenak onartuz egindakoa.
