'Gizarte laguntzen murrizketengatik' ikatza banatu dute Barakaldon

Barakaldoko (Bizkaia) Berri-Otxoak bazterkeriaren aurkako eta eskubide sozialen aldeko plataformako kideek Olentzeroz jantzita ikatza utzi dute Udalean, astelehen honetan: "alkatearen soldata % 4,2 igo da, eta Gizarte Ekintzaren aurrekontua, berriz, % 17,5 murriztu da".

Berri-Otxoak plataformak gogor kritikatu ditu Udaleko 2020rako aurrekontuak. "Gizarte Ekintzaren aurrekontua % 17,5 jaitsiko da eta 9,81 milioi euro izango ditu", esan dute. Gainera, "bosgarren urtez, gizarte laguntzetarako dirua 960.000 eurotan izoztuta geratu da, eta horiek normalean urtea amaitu baino hiru hilabete lehenago agortzen dira", salatu dute.

Plataformaren arabera, "eskandalu larria da", izan ere, "alkatearen soldata igotzeko erabaki lotsagabearekin batera dator gizarte ekintzetara bideratutako diru kontuaren jaitsiera". Hala, azaldu dutenez, aurrekontuek "3.689,19 euroko igoera jasotzen dute udal arduradun gorenaren ordainsarietarako, hau da, % 4,2ko igoera, eta urteko ordainketa 92.184,21 eurora iristen da; horietatik 76.387,99 oinarrizko soldata dira, eta 15.796,22 Gizarte Segurantzako kuota".