Ekonomia -
Asteartean
Krisiaren kudeaketa hobetzeko bilduko dira Sarkozy eta Merkel
Gainera, inbertsoreei segurtasuna ematea dute helburu nagusietako bat azken astean merkatuak astindu dituen burtsen aldakortasunarekin amaitzeko. Hala ere, ez dira eurobonoen inguruan arituko.
Erredakzioa
Frantziako presidentea, Nicolas Sarkozy, eta Alemaniako kantzilerra, Angela Merkel, asteartean bilduko dira, Euroguneko krisiaren kudeaketa hobetzeko eta inbertsoreei segurtasuna emateko, azken astean merkatuak astindu dituen burtsen aldakortasuna baretzeko asmoz.
Frantziako Ekonomia ministroak, François Baroinek, ostiral honetan adierazi zuenaren arabera, egungo egoera "ezin daiteke inola ere mantendu" eta hori argi daukate bi agintariek; horregatik,"euroguneko gobernantzaren berriztatzea bizkortu egin behar dela" esan dute.
Kantzilerraren bozeramaile ofizialak, Steffen Seibertek, iragarri bezala, Sarkozyk eta Merkelek ez dute aurrekontuaren krisiari aurre egiteko eurobonoak sortzeko ekimenari buruz hitz egingo; baina bai lan-metodoen hobekuntzari, krisiaren kudeaketari eta uztailean adostutako akordioen aplikazioari buruz.
Bilera horretan euroguneko gobernantza aldatzeko proposizioak ateratzea espero du Frantziako Presidentetzak. Proposamen horiek uda amaitu baino lehen prest izango zituztela esan zuten Frantzia eta Alemaniako buruek eurotaldeak aurreko uztailaren 21ean egin zuen bileran.
