Ekonomia -
Koronabirusa
Frantziako Gobernuak ohiko jarduera ekonomikoa nahi du uda honetan
Frantziako herritarrek aurten 100.000 milioi euro aurreztuko dituztela kalkulatu du, eta asmoa da kontsumoa sustatzea, ekonomia susper dadin.
agentziak | erredakzioa
Bruno Le Maire Frantziako Finantza ministroak berretsi du laneko itzulera bizkortu beharra dagoela, murrizketak dituzten sektoreetan izan ezik, uda honetan jarduera ekonomikoa bere onera itzul dadin.
“Uda honetan jarduera ekonomikoa normaltasunera itzultzea da nire helburua”; azpimarratu du LCI katean egin dioten elkarrizketa batean, eta gogorarazi du duela 15 egun industria krisia hasi aurreko mailaren % 60-65en zegoela martxan.
“Lanerako itzulera masiboagoa izatea, jarduera azkarrago martxan jartzea” da bere nahia, jokoan dagoena “frantziarren oparotasuna” dagoelako, eta bereziki “ahulenena, langabezian daudenena”.
Le Mairek esan du zergak ez dituztela handituko, eta zor publikoaren hazkundea etorkizuneko hazkundearekin konpentsatuko dutela.
Frantziako herritarrek aurten 100.000 milioi euro aurreztuko dituztela kalkulatu du, eta asmoa da kontsumoa sustatzea, ekonomia susper dadin.
Frantziako Gobernuak 2020ko aurrekontuen hirugarren bertsioa aurkeztu zuen asteazkenean, koronabirusaren krisiaren aurkako talka plana handitzea barne hartzen duena, eta 643.000 milioi euro aurreikusten ditu estatu gastu eta bermeetarako.
Ministroak zehaztu du kopuru hori Frantziaren Barne Produktu Gordinaren % 20 dela.
