Tubacexek Amurrio, Laudio eta Aceralavako enpresa batzordeak deitu ditu gaurko

Tubacexek Amurrioko, Laudioko eta Aceralavako lantegietako enpresa batzordeak deitu ditu asteazken honetarako, taldea berregituratzeko asmoa dutela iragarri ostean, 500 langile kaleratuz, hau da, langileen % 20, sindikatuetako iturriek baieztatu dutenez.

Konpainiak duela aste batzuk iragarri zuen, Akziodunen Batzarra zela eta, berregituraketa bat egiten ari zela, enpleguan doikuntzak egitea baztertu gabe, merkatuaren bilakaera negatiboaren (% 50etik gorako beherakada) eta petrolioaren krisiaren ondorioz. Horiei koronabirusaren krisia gehitu zaie, "egoerak okerrera egitea" eragin duena.

Horren ondorioz, plantilla % 20 murrizteko erabakia hartu du, konpainiako iturriek azaldu dutenez, mundu mailan talde osoan izango den berregituraketa bat, eta EAEko plantetan ere izango du eragina.

2021erako kostuak 25 milioitan murriztea da helburua, eta, enpresak nabarmendu duenez, lantegi bakoitzeko enpresa batzordeekin elkarrizketa prozesua abiatuko dute hori lortzeko.

Taldeak ez du zehaztu lantegien araberako doikuntzaren nondik norakoak, eta langileen ordezkariekin "akordio handiak" lortu nahi dituela adierazi du.

Hain zuzen ere, enpresak Amurrioko, Laudioko eta Aceralavako lantegietako batzordeak deitu ditu asteazken honetan berregituraketa planari ekiteko bilera batera, eta sindikatuek azaldu dutenez, orain arte ez dute horren berri, taldeak egindako komunikazio publikoa izan ezik.

Enpresak zehaztu duenez, une honetan, egungo lan-kostuekin, egoera "jasanezina" da, eta doikuntza horrekin lortu nahi dutena planta bakoitza, banaka, lehiakorra izatea da.

Tubacexek Espainian, Austrian, Italian, Estatu Batuetan, Indian eta Thailandian ditu ekoizpen lantegiak, baita Saudi Arabian, Dubain eta Norvegian ere, Grupo NTS taldearen bidez, mundu mailako zerbitzu zentroak, eta 38 herrialdetan du presentzia komertziala.