Ekonomia -

LAN-GATAZKA

2021ean zehar erizain eta fisioterapeuta gehiago kontratatzea eskatu du Satsek

Urte berriari begira, gainera, Erizaintzako sindikatuak lan-baldintzak hobetzeko eta lan-ingurune seguruagoak bultzatzeko eskatu die administrazio eskudun guztiei.

Erizain bat bere lantokian. Artxiboko argazkia: EFE
Erizain bat bere lantokian.
Erizain bat bere lantokian. Artxiboko argazkia: EFE

A. S. | EITB Media

Whatsapp Facebook Twitter Telegram Email

Erizainen sindikatuak (Satse) ohartarazi duenez, 2021 urte "bereziki gogorra eta zaila" izango da erizainentzat eta fisioterapeutentzat, COVID-19ari aurre egiten jarraitu behar dutelako. Hori dela eta, administrazio eskudun guztiei eskatu die langile kopurua indartzeko, lan-baldintzak hobetzeko eta lan-ingurune "seguruagoak" bultzatzeko, gaixoak eta herritarrak "kalitate eta segurtasun handiagoarekin" artatu eta zaindu ahal izateko.

Urtebetez COVID-19aren hedapenaren ondorioz "krisi larria eta osasun kolapsoa" jasan ondoren, Satsek ohartarazi du txertaketa hasteak ez duela inola ere ekarri behar gaixotasun larri horren aurkako borroka irabazita dagoela pentsatzera eta, beraz, osasun-sistemak dituen "premia ugariak berriro alde batera uztea", gaixo guztiei arreta segurua eta kalitatezkoa bermatzeko.

Hori dela eta, eta urte berriari begira, sindikatuak jakinarazi du bere aldarrikapen-ekintzak areagotuko dituela, osasun-zerbitzu guztiek erizain kopuru nahikoa eta egokia izan dezaten, alderdi politikoek gure herrialdeko Gizarte eta Ekonomia Berreraikitzeko Batzordean hartu duten konpromisoaren arabera.

Horretarako, eta datozen hilabeteetan Satsek bultzatutako Pazientearen Segurtasunari buruzko Legea onartzeko aukeraren zain egoteaz gain, Ganberaren Osoko Bilkuran aintzat hartu ondoren, sindikatuak azpimarratu du beharrezkoa dela profesional horientzako 'Itzulera eta Egonkortasun Plana' abian jartzea, bai eta Erizaintza Graduko unibertsitateko plazak pixkanaka handitzea ere.

Era berean, behin-behinekotasun eta prekarietate tasa altua duen talde profesional baten lan baldintzak hobetzea "guztiz ezinbestekoa" dela adierazi du sindikatuak, eta krisi urteetan galdutako lan eskubideak, hau da, 35 orduko asteko lanaldia edo soldaten igoera justua, errekuperatzea.

Bestalde, sindikatuak neurri "eraginkorrak, bateratuak eta koordinatuak" eskatu ditu Espainiako Estatu osoan, lan-ingurune "seguruak" sustatzeko eta eguneroko jardunean pairatzen dituzten mota guztietako arriskuak saihesteko, besteak beste, gaixoen eta senideen eraso fisikoak eta hitzezkoak.

Gainera, ikastetxe edo institutu bakoitzean gutxienez erizain bat egon dadin eskatu dute, haurrak eta gazteak artatu, zaindu, prestatu eta osasunean hezteko. Hori dela eta, hainbat autonomia erkidegotan hasitako aurrerapena eta garapena bultzatzea espero du Satsek, eta 2021 ikastetxe guztietan "bidezko eta beharrezko" eskaera hori sendotzeko urtea izatea.

Azkenik, 2021ean erizainek sendagaiak erabili eta emateko baimena izatea eskatu dute, eta horretarako beharrezkoak diren protokolo eta gida praktiko guztiak burutzea espero du erakundeak, hala ezartzen baitu erizainen preskripzioari buruzko Errege Dekretuak.

Hau zure interesekoa bada, baliteke beste gai hauek ere izatea
Bizkaiko albisteak Gipuzkoa Nafarroa gaur Araba Euskal Autonomia Erkidegoa Espainia albisteak Ekonomia albisteak Albisteak Gaur Eguneko albisteak Erizaintza gaur Lan gatazkak azken ordukoa Koronabirusari lotutako azken orduko albisteak