Ekonomia -
LAN-GATAZKA
San Juan de Dios Ospitaleko langileek greba eguna dute gaur
Langileek "benetako irtenbideak" eskatu dituzte, bederatzi urte baino gehiago hitzarmenik gabe egon ostean. Santurtziko parketik 12:00etan aterako den manifestaziora deitu dute.
EITB MEDIA
Santurtziko (Bizkaia) San Juan de Dios Ospitaleko langileek greba eguna dute gaur, langileen arazoei "benetako irtenbideak" ematea eskatzeko zuzendaritzari, "bederatzi urte baino gehiago hitzarmenik gabe" egon ostean.
SATSE sindikatuak adierazi duenez, orain arte egindako mobilizazioen ondorioz, zuzendaritza "negoziatzera eseri da" eta bihar (urtarrilak 14) egitekoa dute bilera. Hala ere, zuzendaritzak aldarrikapenak asebetetzeko "edukirik eta konponbide zehatzik gabeko" negoziazioa proposatzen duela salatu du.
SATSE, UGT, CCOO eta ELA sindikatuek antolatu dute greba eguna. Gainera, manifestazio bat egingo dute 12:00etan, Santurtziko parkean hasita ospitaleraino.
SATSEren arabera, "bederatzi urte baino gehiago dira hitzarmenik gabe" eta langileen ordainsariak eta eskubideak eguneratu gabe. "Baldintzak hobetzea" eskatzen diote zuzendaritzari, "kalitatezko zerbitzua eskaini ahal izateko".
"Lehentasunak", langileen iritzian, hauek dira: lanaldia aztertzea, lana eta bizitza pertsonala uztartzeko neurriak hartzea, erantzunkidetasuna sustatzea eta langile guztien garapen profesionala aitortzea.
Sindikatuen esanetan, "egoera konpondu ezean", mobilizazioak deitzen jarraituko dute, "zentroko lan-baldintzak hobetzea lortu arte".