Publizitatea
Itxi

2021/03/18

14:32

Ekonomia

2021EKO AURREKONTUAK

EHUko Gobernu Kontseiluak 437,3 milioiko aurrekontua onartu du

EITB MEDIA | AGENTZIAK

2020ko datuekin alderatuta, % 2,14ko igoera izan du. Proiektuak aldeko 24 boto jaso ditu, bat ere ez kontra eta bederatzi abstentzio.

  • EHUko Gobernu Kontseiluak 437,3 milioiko aurrekontua onartu du

    Leioako Kanpusa. Artxiboko irudia: EFE

  • Whatsapp
  • Whatsapp
  • Telegram
  • Bidali

Euskal Herriko Unibertsitateko Gobernu Kontseiluak ostegun honetan onartu du EHUren 2021erako aurrekontua, 437,3 milioi eurokoa, 2020. urtekoa (428,2 milioi) baino % 2,14 handiagoa. Proiektuak aldeko 24 boto jaso ditu, bat ere ez kontra eta bederatzi abstentzio.

Euskal unibertsitate publikotik ohar baten bidez jakinarazi dutenez, aurreproiektua otsailaren 11n aurkeztu zioten Kontseiluari, Eva Ferreira errektore berriaren lehen bileran.

Testuak ez du zuzenketarik jaso aurreikusitako epean, hau da, martxoaren 4tik 11ra. Aurrekontuaren zenbatekoa 437.374.467 eurokoa da. 2020an 428.221.395 eurokoa izan zen; beraz, aurten % 2,14ko igoera izan da.

Zenbateko horretatik, 333.045.467 euro EAEko aurrekontu orokorretan jasotako ekarpen publikotik datoz; kontzeptu hori kopuru osoaren % 76,15 da.

Eusko Jaurlaritzaren aurrekontuko diru-horniduraz gain, zuzenbide publikoko edo pribatuko beste diru-sarrera batzuk ere jaso dira (tasa akademiko eta administratiboak, administrazio-emakidak, beste erakunde eta pertsona fisiko batzuekiko kontratuak): guztira 52.579.000 euro. Diru-sarrera hori aurrekontuaren % 12,02 da.

Kanpoko kontratuetan, ikerketa-proiektuetan, titulu propioetan eta ikerketa-zerbitzu orokorretarako ekipamendurako diru-hornidura, 51.300 000 euro, aurrekontuaren % 11,73 da.

Bestalde, Euskal Herriko Unibertsitateak 450.000 euro jasotzen ditu Gizarte Kontseilurako.

Kostuak

Gastuei dagokienez, 332.748.849 euro langileei dagozkie, hau da, gastu guztien % 76,08. Gainerako % 23,92 ikerketara, funtzionamendu orokorrera, errektoreordeen jarduerara, zentro eta departamentuetara eta ekipamenduko inbertsioetara bideratutako gainerako ataletan banatu da.

EHUtik nabarmendu dutenez, proiektu honen alderdirik "azpimarragarrienak" dira AZPko plaza guztiak (Administrazio eta Zerbitzuetako langileak), gaur egun arte programa-kontratuen bidez finantzatzen zirenak, orain ohiko ekarpenarekin finantzatuko direla.

Era berean, Eusko Jaurlaritzak Basurtuko eremuan Medikuntza eta Erizaintza Fakultatearen eraikin berria eraikitzeko hartutako "konpromiso irmoari" eusten zaio.

Eva Ferreira EHUko errektoreak proiektua onartu eta gero adierazi duenez, bere taldeak "oso positibotzat jotzen du aurrekontu-proiektu hau izatea, unibertsitate-jarduera osoa garatzea bermatuko duelako eta, aurreko ekitaldiarekin alderatuta, azpiegiturena bezalako atala indartu egingo delako".

  • Bisitatuena

      Kargatzen ikusiena
      Kargatzen ikusiena