Euroguneko langabezia tasa, inoizko mailarik altuenean

Langabezia tasa inoizko mailarik altuenean mantendu zen eurogunean eta Europar Batasunean 2011ko abenduan, % 10,4ean eta % 9,9an, hurrenez hurren.

Eurostatek emandako datuen arabera, abenduko datuak azaroko berdinak dira, hau da, mantendu egin dira.

Espainia da Europar Batasuneko herrialdeen artean langabezia gehien duen Estatua, % 22,9ko langabezia tasa du. Ondoren Greziak (% 19,2), Lituaniak (% 15,3) eta Portugalek (% 13,6) jarraitzen diote. Beste muturrean, berriz, Austria (% 4,1), Holanda (% 4,9) eta Luxemburgo (% 5,2) daude.

Eurostaten arabera, Europar Batasunean 23,8 milioi langabe daude, horietatik 16,5 milioi eurogunean bizi dira.

Aurreko hilabetearekin alderatuz gero, 24.000 pertsona gehiago gelditu dira abenduan lanik gabe EBn eta 20.000 eurogunean. 2010eko abenduko datuekin alderatuz gero, berriz, Europar Batasunean langabeziak ia milioi bat pertsona gehiagori eragiten die (923.000), eta gehiengoa eurogunean bizi da (751.000).

2010ean langabezia tasa % 10ean kokatu zen eurogunean eta % 9,5ean Europar Batasunean.