Publizitatea
Itxi

2021/09/03

11:04

Ekonomia

Gutxieneko soldata

Diaz: "Gutxieneko soldata negoziatzeko elkarrizketa sozialean konfiantza dut, akordiorik egon ala ez"

N. B. | EITB MEDIA

Espainiako presidenteorde eta Lan eta Gizarte Ekonomia ministroak esan duenez, Exekutiboan ezberdintasunak daude argindarraren igoerari aurre egiteko neurrien inguruan, baina herritarrek "alderdi politiko bakoitzaren ñabardurak ezagutzeko eskubidea" dutela uste du.

1:06
Yolanda Diaz.
  • Whatsapp
  • Whatsapp
  • Telegram
  • Bidali

Yolanda Diaz Espainiako presidenteorde eta Lan eta Gizarte Ekonomiako ministroak Radio Euskadin adierazi duenez, erabateko konfiantza du elkarrizketa sozialean gutxieneko soldata negoziatzeko, "akordioa egon ala ez".

"Erabateko konfiantza dut elkarrizketa sozialean eta eragile sozialetan, eta elkarrizketa hori egon dadin tematu naiz", esan du. "Negoziazio hau akordio batekin amaitzea gustatuko litzaidake, baina akordiorik ez badago edo akordioa aldeetako batekin bakarrik badago, ongi etorria izango da", azpimarratu du.

Ministroaren hitzetan, lan pobreziari aurre egiteko tresnarik eraginkorrena gutxieneko soldata da, eta "Europako ia herrialde guztiek igo dute soldata hori, covid-19aren pandemiaren erdian". "Berdintasun sozial hutsagatik, gutxieneko soldata igo egingo da Estatuan", gaineratu du.

Energia publikoko enpresa bat sortzeko Unidas Podemosek egindako proposamenaren erregistroari buruz galdetuta, Diazek esan du talde parlamentarioek "dinamika propioak" dituztela, baina "koalizioa zaintzea" eta "bizikidetza mekanismo guztiak hobetzea" defendatu du.

Ministroaren iritzian, garrantzitsuena da "Gobernuak gobernatzea eta arazoak konpontzea", eta onartu du Gobernuaren barruan ezberdintasunak dituztela argiaren prezioa mantentzeko "neurriak aplikatzeko erritmoa" dela eta.

Horren arabera, "zalantzarik gabe, elkarbizitzarako eta gobernurako mekanismoak hobetu behar dira", eta "dena hobetu daiteke", baina garrantzitsuena da "Gobernuak gobernatzea eta herritarren arazoak konpontzea", nabarmendu du.

Yolanda Díaz elkarrizketaren une batean

Yolanda Díaz, elkarrizketaren une batean. Argazkia: Radio Euskadi.

Ministroak esan du argindarraren egungo garestitze "historikoa" arazoa dela familientzat, enpresentzat eta autonomoentzat, eta Gobernuak dagoeneko neurri garrantzitsuak hartu dituela iragarri du.

Yolanda Diazek aitortu du Gobernuaren barruan ezberdintasunak daudela neurri horien inguruan, "neurri horiek aplikatzeko erritmoen inguruan", "aitzindariak eta oso garrantzitsuak baitira". "Eztabaida da ekimen horiek errege lege-dekretu bihurtu ala ez, berehala aplikatu ahal izateko. Ezberdintasunak izan ditzakegu eta herritarrek alderdi politiko bakoitzaren ñabardurak ezagutzeko eskubidea dute, baina Espainiako Gobernua egiten ari dena nabarmendu nahi dut", gaineratu du.

Ministroak Unidas Podemosen proposamenen berri eman du; izan ere, Frantziako eredua ezartzea eskatu du, energia nuklearrari dagokionez, prezio finkoa ezartzeko eta, hidroelektrikoei dagokienez, "gehieneko prezioa topatzeko".

Langabeziaren datuei dagokienez, gazteen langabeziak bost puntu behera egin duela azpimarratu du, baina "hobetu egin behar da", gaineratu du.

Presidentegai gisa izango duen etorkizunari buruz galdetuta, "orain ez nago horretan pentsatzen", esan du Diazek, baina iragarri du guztiei entzuteko prozesu bat abiatuko duela, ezkerreko alderdi handi bat eraikitzeko asmoz.

  • Bisitatuena

      Kargatzen ikusiena
      Kargatzen ikusiena
    ;