Ekonomia -
''Dieselgate'' auzia
"Dieselgate" iruzurreko gailuak legez kanpokotzat jo ditu Europako Justizia Auzitegiko legelariak
Epaitu aurretik Austriako bi lurralde auzitegik eta Austriako Zibileko eta Zigor Arloko Auzitegi Gorenak egindako galdera bati erantzunez, legelariak eraikitzaileak erabiltzen zituen hiru programa informatikoak aztertu ditu.
AGENTZIAK | EITB MEDIA
Athanasios Rantos Europar Batasuneko Justizia Auzitegiko legelari nagusiak ondorioztatu duenez, 'Dieselgate' auzian epaitutako gailuak, ibilgailuen emisio-maila kanpoko tenperaturaren eta altitudearen arabera manipulatzen zutenak, legez kanpokoak dira. Hala ere, ondorio horiek ez dira lotesleak etorkizuneko epaiari begira.
Austriako Arlo Zibileko eta Zigor-arloko Auzitegi Gorenak eta herrialde bereko beste bi eskualde-auzitegik Europako justiziara eraman zuten kasua, gailu horiek "indargabetzeko gailuak" kategorian sar daitezkeen erabakitzeko, eta, hala bada, legeetan jasotako salbuespenen arabera baimentzeko. Gailu horien funtzionamendua aztertu du legelari nagusiak, ibilgailuak gidatzeko baldintza errealetan.
Bere ustez, "programa informatiko horrek murriztu egiten du ibilgailuen funtzionamenduan eta erabilera normalean emisioak kontrolatzeko sistemaren eraginkortasuna", eta, beraz, "indargabetzeko gailutzat" har daitezke, Europako araudiaren arabera.
"EGR balbula, EGR hozgarria eta diesel partikulen iragazkia erregulatzeko erabiltzen diren indargabetzeko gailu bat ez dago debekuaren salbuespenean sartuta"; izan ere, "elementu horien funtzionamenduak ez du eraginik motorraren babesean".
Abokatuak gogorarazi du, 'CE' homologazioaren testuinguruan, ibilgailuek legedian ezarritako baldintzak bete behar dituztela. Hala ez bada, ibilgailuek "ez dute fabrikatzaileak emandako adostasun-ziurtagiri zehatzik, eta ez daude baimenduta salmenta edo matrikulazioa".
Hori dela eta, eta "erdi mailako kontsumitzaile batek arauka betetzea espero dezakeenez, ibilgailua ez dator bat salerosketa-kontratuarekin".
